Qiddist Gezzaheny
Addis Ababa:- Gobbansa baxxannore, hasaawunni ammantannore, dagate heeshsho woyyeessate loossannore, kaajjadu loosu budi noonsarenna danchu akatoominni xaabbattino ilama kalaqate rosu uurrinshuwara qoteho baalunku agaramannosi qeecha fula noosita Rosu Ministirchi Pirofeeser Birhaanu Nagga xawisi.
Rosu ministirchi Pirofeeser Birhaanu Nagga Xaphoomu ministirchi borro mini qixxeessonni ‘’Ledamate Ilama Kalaqa’’ yaanno uminni jaaloomu xawira harinsoonni hasaawi aana xawisino garinni; techo gobbate aana leeltanno mitiimmubba kaiminsa babbaxxinoha ikkirono batinyootu kayinni rosu amanyootinni kalaqantannoreeti.
Haaro ilama gobbansa baxxannore, dagansa heeshsho woyyeessate loossannore, kaajjado loosu bude afidhinorenna danchu akatoominni dhaabbattinore assate rosu uurrinshuwara qoteho baalunku agaramannosi qeecha fula agarantannonsa yiino.
‘’Ledamate Ilama Kalaqa’’ dandiinannihu egenno nooha, hasaawunni ammanannoha, dancha akatooma afi’rinohanna ikkado dandoo amadinoha assa dandiinirooti yiinohu Pirofeeser Birhaanu; konnira, maate, rosu uurrinshuwanna qooxeessu daga luphiima qeecha amaddannota xawisino.
Itophiyaho sufo noo keeri hala’linota, kalaqamu jirose horonsidhannota miinjunni jawaattino gobba assate bilchaatte loossanno ilama kalaqate batinse loosa hasiissannota xawise; gobbatenna dagate loossanno ilama kalaqate rosu minna hedo kalaqate rosira qoteho loosunni roso aate millimmo hananfoonnita qummeessino.
Rosu handaari aana guma abbitannore haaroonsote loossa loonsanni hee’noonni yiinohu Ministirchu; 12ki kifile gobboomu fonqolo moora gatisate loonsoonni loosinni rosu isilanchimma umbe noo deerra afa dandiinoonnita coyi’rino.
Itophiyu giddo noo 47 kumi rosu minnanni Rosu Ministere bikkaancho wonshitannori 6 rosu minna calla ikkansa xawise; kuri rosi minna derra woyyeessate gobboomu deerrinni baalunku beeqqanno gaado hananfannita qummeessino.
Ministere rosu amanyoote woyyeessatenni hanaffe haammata haaroonsote loossa loossinota kayse; gumulantino loossa mereerinni Yuniversituwa umonsa gashshitannore ikkitanno gede dandiissanno harinsho diriirsa; rosu isilanchimma aana illacha tunge loosanna rosu minna deerra woyyeessate mixi’ne loosa afantannota xawisino. Kurino dancha akatooma afidhinore, loosu budinni jawaatanna korkaatunni ammantanno ilama kalaqate luphiimu qeechi noonsare ikkansa egensiisino.
Hadhannowa affinorenna noo qarrubba tirtanni sa’anno ilama gatamarate xaano ikkiro batinye loossa agarantanno yiinohu Pirofeeserchu; baxxinohunni rosunni ilama kalaqate maate, dagoomu uurrinshuwanna rosu minna egennote hasatto kalaqatenni, dandoo bowirsatenninna mitteenni hee’ra hiittoonni dandiinanniro rosiisatenni keeraancho ilama kalaqate baalunkura yawo noonsata huwachishino.
Bakkalcho Dotteessa 5, 2015 M.D
