Qoqqowoho haanju harumi millimillo hananfinkunni Dubbu diwo 25% ale lexxitino

 – Tayxe dirono Biiloonyu Giwirinnu Biiro ledo halame 365 miloone ale chigginye kaasate qixxaawino

 Abrahaam Saamueel

Hawaasa:– Qoqqowoho haanju harumi millimillo hananfinkunni dubbu diwo xibbuunni 25% ale lexxitinota Sidaamu Qoqqowi Qarqaru, Dubbunna Diilallote Gadi Soorro Biiloonyi xawisi.

Dubbu lexxo suffinota assate tayxe dirono Giwirinnu biiro ledo halamme 365 miliyoone ali haqqu sircho kaasate qixxaawo gundonnita buuxinsoonni.

Sidaamu Qoqqowi Qarqaru, Dubbunna Diilallote Gadi Soorro Biiloonyi Dubbu Latishshi Agarooshshinna Horoonshi Dayirektoreete Dayrekterichi Kalaa Abrahaam Alaaka Itophiyu Pireesete Uurrinsha Bakkalcho gaazeexira xawisino garinni; qoqqowu giddo soorrote albaanni dubbu diwo xibbuunni 21% ikkinota qaagiisse; soorrote gashshooti dayinkunni yaano 2013M.D kayse sasu diri kawa haanju harumi millimillonni dubbu diwo xibbuunni 25% ale lexxitinota xawisino.

Tini soorro dagginohu Qoqqowu umosi dandee tantanami kawa assinoonni jawaata sharronni ikkinota xawisinohu Kalaa Abrahaam; roorenkanni daga umisera noose balchooma horoonsidhe agadha dandiitino daafira ikkinita coyi`rino.

Dubbu sa’u sase dirra sasu diri giddo lexxate korkaata ikkinohu wolu “Dubboho ikkannoha isilancho dooraminoha haqqu sircho qixxeessatenni ikkinota buuxisinohu Dayrekterichu; gobbate nooha baycho kaima assine halalliranna alichaamu bushshira woy baattora sumuu yaannoha haqqu sircho qorophine ogeeyyetenni bandi gedensaanni kaansannihuraati” yiino.

Kalaa Abrahaam, Kalqete aana lexxanni ha`ranni noohu iibbillu bikki, xaa yannara jawa gawajjo iillishanni noohu lophitanni noo Afiriku gobbuwa aana ikkinota buuxise, dubbo garunni latinse agara hoongiro konne qarra diqeellanni. Ikkinohura, dubbu gobbate lexxanni ha`ranno gede assate latisanna agara hasiissannota buuxisino.

Saiha sasenka diro kaansoonniti chiginye baxxinohunni alichaamete xibbuunni 98% qoleno halallite gobbare xibbunni 60% xaphoomunni xibbuunni 82% ale mudhinota kule; kuni dubbu lexxora jawa qeecha fulinota huwachishino.

Tenne yannara dubbu lexxo gobboomunna Sidaamu qoqqowi deerrinni luphi yaa, diilallotenna qooxeessu aana jawa soorro abbinota buuxisinohu Dayrekterichu, gobboomu, qoqqowunna mitte mittente loosu gollara afantanno bissa buusantenna halante jawa qeechansa fula dandiitinohura ikkinota kulino.

Kalaa Abrahaam xawishshi garinni; “Qoqqowu deerrinni dubbu yanna yannatenni lexxanni ha`ranno gede konne dirono Biiloonyu Giwirinnu Biiro ledo gutunni waaxame loosanni noota kule; konne looso mixotenni irkinse giwirinnu widoonni qixxaabbinota agurranna 165 miliyoone ali chigginye kaasate kaajjinshe sunfoonni. Lamenti biiro xaphoomunni 365 miliyoone ale kaasate qixxaabbe noo” yiino.

Qixxeessinoonni chigginye kaasate hasiissanno baatto bada qara looso ikkinota xawise; biilloonyu widoonni 36 kumi 550 heekitaare baatto bande qixxeessinoonni. Kaansanni baleno ummeenna qixxaabbe noota dawarino.

Chigginye kaasa doorsha ikkikkinni gadado ikkinota coyi`rinohu Dayrekterichu Kalaa Abrahaam; konne looso kaajjinshe loosatenni gobbankeranna qoqqowinkera daggannota moolle gargara dandiinnanni hee`noonnita egensiisino.

Tenne yannara Sidaamu Qoqqowi woraddara woleho lawishsha ikkannohu kalaqamunna budu dubbi haammata ikkannoha latinse agaranni hee`noonnihu noota kule; Wonsho budu dubbi 91 heektaare aana, Shabbaadiino Teelamo Xummaano budunni agarame keeshshino dubbi, Wondogennetete Wosha, Arbegoonaho 200 heektaare aana , Daarrate, Alatta Cuukko Teessote olliira, Lokka Abbaayya paarkete ledo amadisiisame noo dubbinna wolootta kullanire ikkinota xawisino.

Konne dubbo seerimalete doogonni dolte uminsa horo aana hosiissinore 12 ikkitanno jaddaasini aana dagatenna mootimmate ledo halamme seerunni xa`mantanno gede assine qorichinshoonnita xawisinohu Kalaa Abrahaam, xaano wolootano xa`misiisate dagatenna hajo la`annonsa bissa ledo halamme loonsanni hee`noonnita huwachishino.

Dagateno, haqqu goofiro manchi beetti aana heeshshote rakko ikkannotanna gawajjote aana uwannota seekkine xawinse kulloonnita buuxise, harunso, huwanyonna qorqorsha hattono addi addi qajeelsha aate looso loonsanni hee`noonnita kalaa Abrahaami xawisino.

Bakkalcho  Badheessa 28, 2015 M.D Hamuse