Amsaalu Felleqe
Addis Ababa:- Itophiyu Abbayi kofo latisate amaddino loosi laayyote gobbuwara woyyaawa xeenu bikka afidhanno gede assatennino sae lolahu dano kalaqantannokki gede qorqoratenninna bua burqitanno gede assatenni duuchu handaari horo uytanno pirojekite ikkase Adaamu Sayinsenna Tekinoloojete Yuniversite Rosiisaanchi Dr Injiiner Xilahun Erduuno xawisi.
Dr Injiiner Xilahun Itophiyu pireesete uurrinshara xawisino garinni; Itophiyaho loonsanni kofo Gibtseteno ikko Sudaanete uytanno horo lowote. Way qarra diabbitanno; bu’a burqitanno assatenna lolahu dano kalaqantannokki gede kaa’litanno.
Kofote loosinna haqqu sircho kaasate harinsho Itophiyunnita diilallote akata woyyeessate; laggate way bikki lexxanno gede assate ragaanni Sudaanenna Gibtse roorenkanni horaameeyye assitanno yiino Dr Injiiner Xilahun. Ikkeennano, mite mite eeliidi laayyo gobbuwa seeda yannara hojjinsa horonsi’ra rossinohura babbaxxitino korkaatubba kalaqqanni gutunni lata dihasidhanno; wolu latisanno woyteno dirkissanno; ‘’ninke calla yinoommohu ikkona’’ yitanno hedo calla kayissanno yiino.
Abbayi lagi du’namanni sa’anno gobbuwa 11 ikkiturono roorenkanni Sudaanenna Gibtse waa roore anga horoonsidhanni keeshshitinohura wayinni harinsanni latishsha bidhattote gede kiirtanno.
Aliidi laayyote gobbuwa kaajjado gutu mittimma dinonsa. Kadote gashshooti hundaanni galtinohura babbadantinoreeti. Itophiyu kayunni kadote gashshooti hundanni galtinokkita callicho gobba ikkasenni hojjisenni uurrintanno gede assate ikkito leeltannota qummeessino.
Gibtse way anje qarri dinose yiinohu rosiisaanchu; Duumu baarinna Mediteraaniyaanu baari mereero heedhannota ikkasenni lowohu baattote giddo way noose gobba ikkase xawisino.
‘’Tini kalaqamu gutu jirooti. Dagate mittimma kaajjishshannote ikkinnina babbaddannota dikkitino’’ yaanniiti Dr Injiiner Xilahu lede coyi’rinohu. Itophiyu latishshunni horoonsidhannonna lophitanno gede hasidhannokki bissa ikkansanni duuchanka woyte buximate giddo heedhanno gede hasidhanno yaanni xawisino.
Bakkalcho Badheessa 28, 2015 M.D Hamuse
