Amsaalu Felleqe
Addis Ababa፡- Tayxehu arri laalchu yannanni 1 miliyoone hekitaare ale baatto Qamadete laalchinni dimboonniha ikkanna 40 miliyoone kuntaali ale Qamadete laalcho gamba assinannita Xaphoomu ministirchi Abiy Ahimed (Dr) xawisi.
Xaphoomu ministirchi Abiy Ahimed (Dr) sa’u muli barrubba giddo dagate riqiwamaano amaale mini 11ki uurrinshu songora amaalete mini miillanni ka’ino xa’mubbara xawishshanna dawaro uyi yannara coyi’ranni; sai hawadi yanna loosinni Qamadete laalcho batinyunni afi’ra dandiinoonni.
Amandoonnihu laalchu dirinni arri laalchu yannara 1 miliyoone hekitaare ale baatto laalchunni diwantino. Konninni, tayxe arri laalchu yannara 40 miliyoone kuntaali ale Qamadete laalcho gamba assinanni yiino. Xaphoomu ministirchi xawishshi garinni; sa’u 50 ale dirrara Qamade gobbaydi gobbuwanni eessatenni egennantinoti gobbanke tayxe umikki yannara Qamade hidhate mitticho Doolareno difushshitino; tini jawa seyooti yiino.
Ikkeennano, muli yanna kawa Addis Ababaho luphiima ikkinohu waagu lexxo xaaddinota qummeesse; akkimale waagu lexxo kalaqantinohu laalchu anje heedheenna ikkikkinni honqooqa daddalaano laalcho maaxxe dikkote aana lalchu anje kalaqantino gede lawisatenni waaga ledate assitanno wo’naalshinni ikkinota coyi’re; xaadinoha laalchu anje qarra tirateno laalcho batinyunni quchuma eessinanni hee’noonnita xawisino.
Baca gobbuwa Itophiyaho luphiima Qamadete laalcho laashshinanni hee’noonnita farcidhanni nooha ikkasi qaagiissinohu Xaphoomu ministirchi; Qamade hala’ladunni laashshate looso hananfi yannara ‘’olu aana hee’neenna Qamade laashsha dihasiissanno; xa kayinni laalchu iilleenna gobbaydi dikkora shiqa Hanafi woyte noosekkihunni liqiissitanni no yitanno hedubba dagganni no. Kunino digaraho’’ yiino.
Ikkollana, kuni naaxxisanno laalchi buxanete mayra iilla hoogi yitanno hedo garaho; halamme akkimale ikkinoha waagu lexxo ajishate loosa hasiissannonke yaanniiti coyi’rinohu. Xaphoomu ministirchi xawishshi garinni; laalcho hala’ladunni laashshate ragaanni jawa qeelle loonsoonni. Kayinnilla, daddalu amanyooti taala noosi. Keella cufatenninna qorqorsha batisatenni kalaqantanno qarrubba taashshate loonsanni.
Ruusiyu, Qamade gobbaydi dikkuwara sokkanno woyte gobbate giddo luphiima hasatto noota qaagiissinohu Xaphoomu ministirchi; wolootu anga agadhite hee’rantenni umose dandiite laalchose gobbaydi dikkora soya hanaffu yannara kayinni Itophiyunte gede gobbate giddo luphiima laalchi hasatto noonkanni yiino.
Aantanno lamenna sase dirrarano Itophiyaho Qamadete laalchi lexxanni ha’rannoha ikkanna gobbate giddo hasattonni sae gobbaydi dikkora soyate ikkado laalcho laashshinanni. Qamade laashshate looso mannu lowohunni rosanni daynohura maashinna batinyunni eessinanni qasiisotenni loonsanni baatto hala’litanna laalchuno lexxanni ha’rannota xawisino.
Laalcho maaxxe ataachidhanno bissano dikkote aana laalchu anje kalaqantanno gede assantenni angansara noo laalcho yannantenni dikkote hiqishatenni hira noonsatanna yannatenni hira hoogguro kayinni laalcho ataachi’ra kisaaraho reqecci assitannota huwachishino.
Haaru laalchi dayikkinni gobbate giddonna gobbaydi dikkora shiqisha hasiissannotano qummeessino. Minu minunkunni noo laalchi dikko fulannonna heeshshote oolto ga’labbi yitanno gede assateno mootimmatenna dagatewiinni hala’ladu mini loosi agarannotano amadisiise xawisino.
Bakkalcho Badheessa 28, 2015 M.D Hamuse
