Qiddist Gezzaheny
Addis Ababa:- Soorrote gedensaanni poletiku beeqqonna hanqafaanchimma lossitanno qaafo adhinoonni yiino; Jireenyu Paarte Laynki pirezidaantichinna Paartete qaru borro mini sooreessi kalaa Adem Faarah.
Kalaa Adem Faarah Itophiyu Pireesete Uurrinsha ledo assino hasaawinni; soorro abbitino hexxo la’’ate; poletiku, miinjunnino ikko dagoomittete akatinni hee’noommowa qaaga hasiissannota kayisino.
Soorrote gedensaanni qarunni dimokiraasiweelo harinsho hattono roduuwimmate budi harinshotenni shaalanni ha’rasanni kalaqantino qarrubba no yiino.
Dimokiraasiweelo harinsho ledo amadisiisaminohunni poletikunna dimokiraasete bikki ajanno gede assatenni wolaphote bikki ruukkino. Dimokraasete uurrinshuwa daafurte luphiima mannihimmate qoosso xiiwo kalaqantanno gede assitino yaatenni huwachishino.
Kalaa Ademi xawishshisinni; yannate gaancenna kiphote kaima badantenni wolqatenni fugatenna hi’naanchimma calla buuxisate ikkito kalaqantino; qarrubba gamba yite mootimmate mittimmanni aleenni gibbo hala’litanno gede waalcho fantino qarri kalaqaminonkanni yiino.
Soorrotenni qarrisanno akata soorrate ikkado poletiku qaafo adhinoonni. Konninnino kaphu duduwo hunatenni dagatenna dagoomu mittimma aana safamino Itophiya kalaqate loonsanni hee’noonni yiino. Ledamate hedo bowirte daggino yiinohu kalaa Ademi; noonkere dancha coye mittowa qolle gobbankera wo’munku handaari jireenya buuxisate dandiissanno loossa qara illachanke ikkitino yiino.
Soorrote gedensaanni assinoonni hedote soorronni gobbanke keeraanchimma xiibbanno ikkitubba diigantino. Daga gobboomu hajubbanna gutu horo aana mittimmatenni uurrate dandiisannohu injiino akati kalaqaminonsa daafira gobba kaajjisha dandiinoonni.
Wole widoonni soorrote gedensaanni poletiku beeqqonna hanqafaanchimma lossitanno kaayyo afi’noonni. Paartete deerrinni gobboomu hajubba aana murate kaayyo hooggino paartuwa gobboomu massagaancho paarte biso ikkitanno gede kaa’litannoti ikkado paarte safantino yaanni coyi’rino.
Poletiku amanyootenke yannaasincho assatenna dimokiraasete amanyoote kaajjishate kaa’litanno seeru woyyaambe loossa gumulantino yiinohu Jireenyu Paarte Laynki Pirezidaantichi; doorshu seeri, danchummate loossa, sivilete daganna cancishaanchimma giwate lallawubbanna woloottano seeru woyyaambe assinoonni. Assinoonni woyyaambe dimokiraasete amanyooti kaajjanno gede qaru dargi noonsa yaattenni xawisino.
Seeru, farcotenna dimokiraasete uurrinshuwa wolaphotenna mereersino garinni bayiriidi seeri uyinonsa yawo fultanno gede kaa’litanno tantano kalaqantino. Doorshu boorde, mannoomittete qoossonna woloottu uurrinshuwa massagooshshunnino ikko seerunni kaajjitanno gede hala’lado sharro assinoonni.
Kalaa Ademi xawishshi garinni; adawu uurrinshuwa bayiriidi seeri uynonsa yawo fultanno gede kaa’litanno woyyaambe assinoonniha ikkanna; dimokiraasete bikka halashshate injoo kalanqoonni.
Soorrote mootimma qarrunni dukkisantinota ikkase huwachishinohu kalaa Ademi; harinshotenni qansootu wolapho rossanno gede hala’lado kaayyo uynoonniha ikkirono; uyinoonninsa wolapho seera agadhino garinni horonsi’rate widoonni foonqe kalaqantinota huwachishino.
Wole widoonni gibbo kalaqqino qarrinni qansootu reyo, dartenna jajju gawajjama kalaqantino yiino.Dagatenna dagoomu mittimma kaajjishatenni, taashshe la’’anna gibbo sharramatenni konni aleenni loonseemmo.
Qara ikkitino hajubba aana sumuu yaate hanqafaancho ikkitinoti gobboomu hasaawu harinsho gummaame ikkitanno gedenna hendoonni guma gantanno gede assa qara illachankeeti yiino.
Bakkalcho Badheessa 28, 2015 M.D Hamuse
