Addisu Adoola
Hawaasa:- Hawaasi Tegibaare-Id Tekiniikenna Ogimmate Rosunna Qajeelshu Kolleejje tekinoloojete heewo ha’risa hanaffu. Kolleejje bero barra kolleejjete hoowe giddo ha’risa hanaffino tekinoloojete heewora 20 ale ikkitanno tekinoloojete gumma heewote shiqishshinoha ikkanna heewoteno Kolleejjete rosiisaano, rosaanonna Interipirayzootu beeqqaano ikkitino.
Barraho afame odeessaanote hedosi uynohu barru wosinchi Hawaasi Quchumi Gashshooti Tekiniiketenna Ogimmate Rosunna Qajeelshu Biddishshi Sooreessi Kalaa Gezzaheny W/Sembeti; baalunku handaari loossa tekinoloojeetenni irkisamino garinni loosa yanna horonsi’ratenna gumaamimma luphi assate qeechishe luphiima ikkinota xawinsi.
Tekinolooje horonsi’ra loosu yanna seendille ajishatenna hasi’noonni guma harancho yanna giddo maareekkisiisate hee’rannose qeechi luphiimaho yiinohu Kalaa Gezzaheny; konni kaiminni, tekinoloojete handaarira illacha tunge loonsanni hee’noonni yiino.
Tekinoloojete loossa boowirsate tekinoloojete heewo assinanni. Konni albaannino assinanni dangoonni heewubbanni dagate qarra tirtanno tekinoloojubba loosu aana hossino. Techono ikkiro heewisamaano haaroo tekinoloojubba maareekkatenni dagate heeshsho shotisanna daganke qarra tira dandiisiisanno akata kalaqa dandiitanno gede ammannanni yiino.
Lowo geeshsha daafureennanna lowo womaashsha fushshineenna loosantino haaroo tekinoloojubba hasiisanno deerrinni tareessa hoogate qarrubba leeltanno gedeno qummeessinohu Kalaa Gezzaheny togoo qarrubba tirateno loonsanni hee’noonnita qummeessino.
Hawaasi Tegibaare-Id Tekiniikenna Ogimmate Rosunna Qajeelshu Kolleejje Diine Kalaa Ashshenaafi Argatihu isi widoonni; tekiniiketenna ogimmate rosunna qajeelshu kolleejjubba qajeeltino mannu wolqa dikko shiqatennino sa’e haaroo tekinolooje burqisate gobbaydinni dagganno tekinoloojete gumma gobbate giddo riqiwa qara sokkaseeti yee; kolleejjensano konne gumulate kaajjite loossanni noo gede huwachishino.
Kalaa Ashshenaafi, harancho yanna qixxaawonni kolleejjete deerrinni 20 ale ikkitanno tekinoloojete gumma heewote shiqisha dandiinoonnita qaagiisse; kunino baalunku kaajjine loonsummoro gobbanke hasidhanno geeshshi laalcho gobbate giddo riqiwa dandiineemmota leellishannoho yiino.
Heewote shiqqino tekinoloojete gummano dagoomu qarra tirtannota ikkaseno la”ate dandiinoonni.
Bakkalcho Badheessa 21, 2015 M.D
