Qiddist Gezaheny
IFDR dagate riqiwamaano amaale mini 11ki uurrinshu songo Xaphoomu ministirchi Abiy Ahimed afaminowa harinsoonni. Xaphoomu ministirchi Abiy Ahimed uyno dawaronna xawishshinni; “Xa noohu keeru akati bashshoohunni woyyinoho” yiino.
“Keere lainohunni sai lewu aganira albaanni noohunni woyyino akati no; wo`mu keeriwa iillate haammata loossa loosa hasiissanno; ikkolla ikkinnina mitte qaafo albira massino looso loonsoonni; olu uurrinte gede hakkawoyntenni keeru didirranno xiiwo no” yiino.
Sa`u 50 nna 60 dirrara Itophiyu giddo noo polotiki sorote, sharretenna wolqate polotika ikkinotano kayisino. Keeru hasiisannoho yine ammanneemmo yinohu xaphoomu ministirchi “Keeru olu gede bareendimma hasi`ranno; oluwinni ajinokki looso daafuro xa`manno” yeeno huwachishino.
Itophiyaho wodanchinanni gaancubba gargadhatenni sufote keere dirrisate gutunni loosa hasiisanno. Itophiyaho babbaxxino qooxeessubbara wodanchinanni gaancubba gargadhatenni sufote keere dirrisate gutunni loosa xa`mannota Xaphoomu ministirchi Abiy Ahimed xawisino.
6ki dagate riqiwamaano maale mini 2ki diri loosu diro 11ki uurrinshu songo aana amaalete mini miila kayissino xa`mubbara Xaphoomu ministirchi Abiy Ahimed dawaro uyno. Konninni, Soojjaatu Wollaggi qooxeessira Shene qodhaano assitanno millimillo keerunni tirate mootimma hadhino xeertinye lainohunni xa`mo shiqqinosi.
Xaphoomu ministirchi uyno dawaronni, sa`u onte dirrara Wollaggu qooxeessira kalaqantinoti keeru hoonge latishshu loossa loosate guficho ikkantenni sae mannu reyoranna darammete korkaata ikkinota kayisino. Qooxeessaho kalaqaminoha keeru hoonge noowa qolate mootimma luphiima hasatto nooseta xawise; konnirano, keeru komite uurrisatenni loonsanni hee`noonnita huwachishino.
Qarra tirate sa’u lame agannara mootimmate widoonni tonne ale ikkitanno wo`naallo assinirono qooxeessaho millissannoti qodhaano wolquwa dirantinohu mittowa ikkinokkihura harinshote qarra gantinota kulino. “Keere gibbanno wolqa dino” yiinohu Xaphoomu ministirchi seyoote kaajjine loonseemmo yaatenni mootimmate uurrinsha xawo assino.
Ikkollana, keereho assinanni wo`naalshinni qote qoteho mootimmanniti ga`labbote wolquwa qooxeessu keere ayirrisiisate kaajjado looso loossanni afantannota buuxisino. “Mimmito shaa ayeno dihoraameessitanno” yiinohu Xaphoomu ministirchi; qarrubba hasaawunni tira horaameessitanno yiino.
Keeru harinsho lainohunni guma gutunni la`neemmoha ikkanno yeeno coyi`rino. Aliyye Itophyu qooxeessira assinoonni oli uurrasi mitte qaafo albira qaafisinonke; ikkollana, wo`mu keeriwa iillate haammata loossa agartannonke yiino.
Gaancubba gobbate lopho badhera goshooshshanni noohura keeru dirranno gede gutunni loosa noonke yiino Xaphoomu ministirchi.
Bakkalcho Badheessa 21, 2015 M.D
