Amsaalu Felleqe
Hawaasa:- Qoqqowoho nooti safote latishshuwa iillo jawaachishshannota ikkiturono,garunni amadatenna gashshate widoonni laanfe noota keennoonnita xawinsi’
Tenne xawinsoonnihu qoqqowu amaale mini 6ki doyicho 2ki loosu diri 4ki uurrinshu songo sa’u muli barrubba giddo Hawaasi quchumira harisatenni qoqqowu mootimmaha 2015 baajeettete diri lamalu agani mixote gumulsha keenni yannaraati.
Sidaamu qoqqowira sa’u lame dirrara safote latishshuwa halashshate ragaanni gattono heedhuro jawaachishshanno loossa gumulloonnitano amaalete mini qummeessino. Baxxinohunni doogonna xalala anganni way uurrinshubba halashshate jawa illacha tunge loonsanni hee’noonnita kulloonni.
Xalala anganni way halashsho lainohunni xibbuunni 52% noowinni 56% iillishate mixo tunge loonsanni hee’noonni. Lawishshaho, Majo quchumira, Qawaado, Cirrete quchummara way uurrinshubba halashshinanni hee’noonni. Daayye quchumirano sa’u muli yanna giddo 376 miliyoone birra gaamme quchumu daga wo’mantera iillanno way uurrinsha loonsannita qoqqowu pirezidaantichi kalaa Desta Ledamo shiqishino riippoortenni buuxate dandiinoonni.
Qoqqowoho woloottano babbaxxitino qooxeessubbara xalalu anganni way uurrinshubba gatamarranni hee’noonnitano Pirezidaantichu riipoorte leellishshanno. Handaarunni hajo la’anonsa bissano amaalete mini miillanni ka’ino xa’mubbara dawaro qoltinoha ikkanna; loonsanna gatinori hee’rirono hala’lado loossa handaarunni gumulloonniha ikkanna; loonsoonnita wayinna dooggate uurrinshubba gashshate ragaanni kayinni qarrubba noota la’noonni yiino; Pirezidaantichu.
“Way widoonni haaro way uurrinshubba loosate qarri dino; loonsoonnita way uurrinshubba gashshate qarraati noohu’’ yiino Pirezidaantichu kalaa Desta. “Handaara massagganno bissa daafurte loossanni nooha ikkirono; lowo jiro dunnoonni handaara gashshate ledo gobba galle kiirre loosanna garunni gashsha xa’manno’’ yee; handaarunni alinni eeli geeshsha jawa soorro abba xa’mannotano huwachishino. Wayinna culuuta doogo loosi jawa jiro xa’mannotano qummeessino.
Batinye doogga loonsi geeshsha batinye buussano hasiissannoha ikkirono; mittu mittunku buusira jawa woxe xa’mannoha ikkasi qummeessino. Lawishshahono, Gidaawo-3 woy Duguni buusa yaamamannohu 43 miliyoone birrinni loosamanni noota qummeessino.
Amandoonni baajeettete dirinni 12 buussa loosate mixi’nonnite giddonni 2 gumulloonni; gattinoreno woxu wolqa fajjitu garinni buussa roorsine loonsanni gundannita huwachishino. Qoqqowoho safote latishshuwa iillo ragunni hadhanni nooha ikkirono; safote latishshuwa qorqorranninna gashshinanni hayyo bilchaantete foonqe hee’ra loosantino pirojekituwanna uurrinshuwa aana foonqe kalaqantanna huwantanni daafira deerru deerrunkunni afantanno massagaano uyinoonninsa dilaala ragunni fultara duu’re sokkasi sayisino.
Bakkalcho Badheessa 21, 2015 M.D
