. Keere abbate olunni ajjinokki bareendenna daafuru hasiisanno
Abbebech Maatewoos
Addis Ababa:- Qarra dandiine gobba kaajjishankenni Itophiyu diigantanno yanna sa`ino yee xaphoomu ministirchi dokiter Abiy Ahimed xawisi. Itophiyu ledante jifose sa`ino yeeno coyi`rino.
6ki dagate riqiwamaano amaale mini 2ki diri loosu yanna 11ki uurrinshu songo harinsanna xaphoomu ministirchi Abiy Ahimed amaalete mininni ka`inosi xa`mubbara dawaro uyino.
Xaphoomu ministirchi Abiy tenne yannara coyi`rino garinni; haammata gobbuwa xiiwo gashshitannankenna fullanni furcho qixeessitannonke yannara gobbanke hunne diha`noommo; qarra dandiine gobba kaajjishankenni Itophiyu diigantanno yanna sa`ino yino.
Keere abba lowontanni hasiissannota ammanneemmo yiinohu xaphoomu ministirchi Abiy; ikkolla ikkinnina keere abbate olunni ajjinokki jawaantenna daafuru hasiisanno. Konnirano duuchanti daga agaramannose wo`naalsha assitara hasiisanno yiino.
Ha’nanni hee`noommohu wo`ma keere abbateeti; keeru qole woyyaambete ikkinniina co’o yiinoha dikkanno yinohu xaphoomu ministirchi; baxxinohunni eewaanchu keeri baca “Ninkewinni gato; keerunni tirfi`neemmohu rooranno” yee ammana xa`mannota buuxisino.
Dokiter Abiy egensiisino garinni; Itophiyu giddo leewu/6/ aganira albaanni noohunni techo woyyino keeri no. Wo`mu keeriwa iillate haammata loossa agartanno. Ikkollana qawwe gananna shoo uurritanno woyte hakkawontenni keeru foole foo`linanni yaa dikkino; gaance gashshitanno mada rakke hurtannota dikkitino yee coyi`rino.
Konni korkaatinnino keeru foole dirrisate jifo ikkino; keeru hasiisannoho yine ammanneemmo; sufote keerira jawaante loonseemmo yiino. Mootimma ise widoonni Itophiya kaajjisha dandiissanno seera ayirrisiissanno uurrinshubba ijaartino. Afriku gobbuwa lede hinaassannota ga`labbote bissa tantannoommo. Konni gedensaanni gobba diigantanno yitanno huluullo dinonke yiino.
Aanteteno qarrubba tira dandiisanno loosi gumulamanni afamanno. Kontirobaande, seerimale qodho, babbaxxitino basera manna shaanna mulqa gargadha dandiisanno garinni gobbate gargarooshshinna Federaalete polise batinye qooxeessubba amaddanno gede loonsanni afammanni yee egensiisino.
Haaro ga`labbote tantano harinsho hanafonni gumma la`noonni; aantanno agannara gumaamimmasi roore kaajjitanno yitanno ammano nooe yiino. Dokiter Abiy xawishshi garinni; baalante qooxeessubbara noo wolquwa bayiriidi seeri garinni bikkinsanni ikkitanno gede hananfoonni loosi no. Ikkollana xa babbaxxitino basera sa`e sa`e leeltanno qarrubba ajjanno gedenna ba`anno gede mootimma hasiisanno wo`naalsha assitanno.
Keere gibbanno wolqa dino yinohu xaphoomu ministirchi gumahono jawaante loonseemmo yino. Shene lainohunni qarra tirate sa`u lame agannara mootimmate ragaanni tonne ale ikkitanno yannara wo`naalshubba assino ikkinnina qodhaano wolquwa mittowa gamba yitinokkihura harinshote qarra gantino yino.
Keeru wo`naalsha paartete gede hasaambe gumulloommoho; mootimmano keeraabbino doogonna hasaawunni tirate murciraanchote, wolootta qooxeessubbara gaancubba keerunninna hasaawunni tirate loonsoonni loossanni danchu gumi leellino yee coyi`rino.
Keereho assinanni wo`naalshinni qote qoteho ledote shoonna daramme kalaqantannokki gede wolquwanke qooxeessaho kaajjado looso loossanni noota xawisino Dokiter Abiy xawisino garinni; Itophiyu giddo heedhinoti sarraaqamate, sharretenna wolqate polotiki techo dihasiisanno. Xaa hasiisannonkehu keerunna gatote doogooti.
Itophiyu Itophiyu dagate; hiikkuno Itophiyu qansichi hiikko qooxeessirano millise loosate qoosso noosi. Gutu gobba gatamaara hasiissanno; Itophiyahono gumulantannota dimokiraasete wo`naalshubba qarrunkunni ledo ikkirono irkisa hasiissanno yino. Daassenechirano, woloottu dagara gobba ikkitanno Itophiya anete yee ammananno gobba gatamaarrummoro Itophiyu duuchaho ikkitanno; noohu hasiisannokki saami kayinni huno abbanno yee buuxisino.
Dannu qooxeessira xaaddanno qarrubba keeraabbino doogonni hasaawunni tirate Itophyu balaxo uyitanno hajo ikkinota xaphoomu ministirchi buuxise; dannu hajubba aana Suudaanetenna Wodiidi Suudaane mootimmubba ledo hasaawu aana xintantino loossa gumulantanni noota egensiisino.
Bakkalcho Badheessa 21, 2015 M.D
