Gaazeexu odeessaanchinni
Otoottote birxichi kaansere amuwu fayyimma aana jawa gawajjo iillishshanni afantannota Sidaamu qoqqowi fayyimmate biiro xawissu. Biirote layinki sooreessi, dhibbu gargarooshshinna fayyimmate bowirshi dayirektoreete dayirektere kalaa Belayneh Beqqelehu coyi’ranni; kuni dhibbi mannimmate giddo rie keeshshannoha ikkasinni amuwu fayyimma aana jawa gawajjo iillishanni afamanno.
Konni daafira gargarooshshu looso fayyimmate uurrinshuwara calla tunge agurrikkinni baalunku halamme huwanyootu aana loosa agarantannonke yaanni huwachishinno. Konni alba qoqqowu garinni dagate fayyimma gawajjanni keeshshinohu taraawanno dhibba ikkasu kayisino kalaa Belayneh; xaa yannara kayinni babbaxxinohu taraawannokki dhibbino jawa daga gawajjanni afamannoha ikkanna, kuri mereerinnino otoottote birxichi mitto ikkasi kulino.
Konne dhibba gargadhate umihunni gargarooshshu hayyo aana dagankera baxxinohunni amuwaho huwanyo kalaqa hasiissannota dayirekterchu qummi asse; amuwu gargarooshshu aana huwanyo afi’re fayyimmate uurrinshuwara shiqe buuxo assi’ranno gede baalanti dagoomu bissanna baxxinohunni handaaru ogeeyye kaa’late yawo noonsata qaagiissino.
Amuwuno tenne afe fayyimmate xaawubbara shiqe buuxo assi’ra hasiissannonsata lede huwachishinno. Qoqqowu Fayyimmate biiro garinnino amuwu otoottote birxichi Kaansere mayimmanna iillishshara dandiitanno gawajjo lainohunni huwanyo kalaqate illachishshe loossanni afantanno yinohu kalaa Belayineh; dirinsanni 14 ikkinonsa seenni kittiwaate adha hasiissannonsatanna 30 -50 diri geeshsha noo amuwi sasu sasu aganinni fayyimmate uurrinshara shiqe buuxo assi’ra de’’a noonsakkita lede qaagiissino.
Konni gobbaanni meyyatano ikkito labballu qoropho nookki siimu xaadooshshinni qorowamanna mittu mittetenni ta’ma hasiissannota sooreessu kaajjishe huwachishinno. Otoottote birxichi kaansere aana dagoomaho huwanyo kalaqate amma’note uurrinshuwa, gobbate geerri, fullahaano, fayyimmate ogeeyye,, miidiyu uurrinshubbanna wolootuno hajo la’annonsa baali qeechansa fultanno gede kalaa Belayineh sokkasi sayisino.
Bakkalcho Badheessa 14, 2015 M.D
