Abrahaam Saamueel
Jireenyu paarte gobbankera taalo horonsiraanchimmanna dimokiraasete aana xintantino mittimma abbate wo`naaltanni noota Paartete Layinki Pirezidaantichi Kalaa Adem Faarah xawisno. Jireenyu Wedellu Liige Mereershu Komite Miillara ”Wedellu dhukinni Itophiyu jireenya buuxisiinsanni” yaanno uminni Bahir Daarete Quchumira Mitte lamalara uynanni keeshshinoonni qajeelshi jeefamino.
Paartete Layinki Pirezidaantichi Kalaa Adem Faarah tenne yannara xawisino garinni; gobbate taalo miinju horonsiraanchimmanna beeqqo buuxisiisa Paartete qara mixooti. Kunino, qooxeessa qooxeessanko daga noose eltonna dhukinni loosidhe duubbanno gede gobba gatamarate waalcho faninoha ikkinohura miinjunni, dagoomittetenna hattono poletikunni seyoo borreessinoonnita coy`rino.
Duuchu dani laalcho amaddinota miinju poolise harunsatenni hegeraame ikkitino horonsiraanchimma buuxisiisate assinanni wo`naalsha, jireenyu wedelli liigete massagaanonna miilla uminsa qeecha fultanno gede qaagiissino. Amaaru Qoqqowi Layinki Pirezidaantichi Dr Geetaachew Jemberehu isi widoonni, jireenyu weelli liige mereershu komite miilla tenne yannara kalaqamanni nooha daga daganniwa babbadate assoote sharramatenni gobba geisate amandoonni timo guma gansiisate qeechi’ne jawaho yanni xawisino.
Dagatenna dagoomu mittimma aana xintamino jireenyi, hedotenna assootunni gurko nookkiha ikkirono, giddoydinna gobbayidi diinna qarra kalaqqanni nooti anfoonnita ikkitinohura, wedellu konne huwatte soorro suffanno gede loosa hasiissannonsa yiino.
Itophiyaho soorro dagganno gede sharrantanno wedella deerru deerunkunni laashshate loonsanni hee`noonnita xawisinohu Wedellu Liige Pirezidaantichi Wedellichu Akiliilu Taaddessehu, hananfoonniha gobbate gatamarsha qinaawinoha assate deerra deerranko noo wedellu massagaano dhuka haaroonsatenni dancha akata abbate looso loonsanni hee`noonni. Kunino, mereershu komitera uynanni hee`noonnihu dhuka haaroonsate qajeelshino konne leellishannoho yiino.
Kuni qajeelshi xaa yannara gobbatenna kalqete noo akata huwatatenni gobbate deerrinni xaaddanni noo guffa sa’’ate dandiisiisanno dhuka kaajjishate ikkinotano coy`rino. Qajeelshu beeqqaanono, qajeelshunni afidhino egennonna rosicho horosidhe ga`a gobba riqibbanno massagaano ikkansa affe xaanni qixxaawa noonsata huwachishino. Bahir Daarete Quchumira mitte lamalara uynanni keeshshinoonni qajeelsha 223 Jireenyu wedellu liige Mereershu komite miilla beeqqitinota kulloonni.
Bakkalcho Badheessa 14, 2015 M.D
