Qiddist Gezaheny
Sidaamu qoqqowi Borrichu woradira tayixe haanju sumudi mixo gumulsate 2.1 Miliyoone ali chiginye qixxeessinoonnita Woradu Giwirinnunna Irshu latishshi borro mini egensiisi.
Borrote mini dagoomu hanqafo laayyote latishshi millimillonni 35 Miliyoone birra hendanni owaante baatooshshiweelo aate mixo amadinota xawisino. borrote mini sooreessi kalaa Rahimeto Addaamihu Itophiyu Pireesete Uurrinshara xawisanni; aantino hawadi yannara gumullanni haanju harumi mixora 3 Miliyoone ali chiginye qixxeessate hende xaa geeshsha 2.1 Miliyoone ali chiginye qixxeessinoonni. Konninnino 85 anga xibbuunni jeefinsoonni.
Borrichu Woradi hige hige wayi anjenni moollete reqeccaawanno qooxeessa ikkasi kayisinohu kalaa Rahimeto; dagoomunna mootimmate sharronni xaa yannara diilallote akati woyyimma leellishanni afamanno. 45 kume ikkitanno daga beeqqisiisino dagoomu hanqafo laayyote latishshi nni, millimmo hananfi 2003 M.Dnni kayinse 8 kumi Hektaare ali baatto latisa dandiinoonnita kule; tayixe millimmonni calla 4 kume 450 Hektaare baatto latinsannita xawisino.
Woradaho moollete reqeccaabbino qooxeessubbara luphiima gawajjo iillitannota kayisinohu kalaa Rahimeto; tayixe harinsanni hee’noonni qinaawino laayyote latishshinni woyyaawino looso loosate mootimmanna dagoomu sharramanni afamanno yino. Sai diro loonsoonni laayyote loosinni 29.5 Miliyoone birra hendanni owaante dagoomu uyinota kayisinohu sooreessu; sai dirinni afi’noonni danchu rosichinni tayixe diro 34.9 Miliyoone ali birra gatisate mixo amandoonnita xawisino.
Woradaho sa’u 12 dirra giddo gumulloonni laayyote latishshi loosinni gawajjantino qooxeessubba babbaxxitino mu’ronni diwa hanafankenni gidu laalchira injoo kalaqantinotanna bushshu hoshooshamara reqeccaambete bikki ajanni dayinota sooreessu lede kulino.
Loosantino laayyote loossanni bushshu hoshooshamanni darantanno daga kiiro ajjinoha ikkanna 78 anga xibbuunni Gammoojjaame ikkitino qooxeessubba alichchaa’mate widira reekkantino; hattono loosidhe galtinori laalchimma lowo geeshsha lexxitinota borrote mini sooreessi kalaa Rahimeto uurrinshankera lede xawisino.
Bakkalcho Badheessa 14, 2015 M.D
