Amsaalu Felleqe
Hawaasa:– Sidaamu dagoomu qoqqowira heeshshote oolto kalaqantanno gede kaima ikkitannore honqooqa daddalaano aana kaajjado harunso assinanni hee’noonnita Qoqqowu amaale mini qara songaafitte dukko Faantaye Kebbede egensiissu.
Songaafitte tenne yitinohu Sidaamu qoqqowi harinsanni keeshshino qoqqowu Amaale mini 6ki doyicho 2ki loosu diri 4ki uurrinshu songo aanaati. Qara songaafitte xawishshi garinni; dikkote aana laalchu anje kalqantanno gede assatenni dagooma caacceessatenna dikkote oolto kalaqantanno gede assitanno daddalaano aana deerru deerrunkunni afantannori amaalete mini miilla wolootta haja la’annonsa bissanni ledo qinaawatenni kaajjado qorqorsha assitanni afantanno.
Amaalete mini miilla duuchunku latishshunna danchu gashshooti handaarubbanni dagoomu kasseenyanna horaameessimma lossate mixi’noonni mixo garunni gumulantanni afantannota deerru deerunkunni harunsonna keeno assitannoha ikkanna; roorenkanni dikkuwate qooxeessubbara honqooqa daddalaano laalcho maaxatenni kalaqqannoti laalchu anjenna akkimale waagu lexxo dagoomu heeshshote ooltonni caaccaawanno gede assitanno.
“Daddalaano garunni loosi’ra dandiitannohu geexaano heedhurooti” yitinoti Songaafitte dukko Faantaye; dagoomu aana kalaqantanno hekko gargarate loosi haja la ‘annonsa bissaha ikkirono; amaalete mini kayinni jawa illacha tuge loosanno gede raga worroonni yitino. Dagoomunnita latate hasatto kaima assatennino dannunni xaaddanno qoqqowubbanni ledo halamatenni daga uminsanni keerenna ga’labbo agadhitanno gede assinanni hee’noonnitano amadisiisse kayissino.
Wole widoonnino, baincho assootubbanna moora gargaratenni mooraanchimma effidhe gibbanno qansoota kalaqate loosino yanna uynannikkiha ikkasi egensiissino. Heeshshote oolto ajisha dandiinannihu laalchonna laalchimma lossatenniiti yitinoti ayirrado Songaafitte; dagoomuno latishshu loossara jawa illacha tugatenninna laalchimma lossi’ratenni dikkote aana laalchu anje kalaqqannore honqooqa daddalaano uminsanni qorqora dandiitanno harinshono kalanqanni hee’noonnita qummeessitino.
Xaa geeshshano dagoomu aana heeshshote oolto iibbabbitanno gede assate laalcho maaxxino daddalaano aana hedeweelcho qorqorsha assatenni iillinoonniri aana taashshote qaafo adhinanni hee’noonnitano xawissino. Amaalete minihu qaru loosi bayriidi seerinni uynoonni biilloonyi garinni gumulsiisaano bissa keenanna irko assa ikkinota huwachishshinoti Songaafitte; amaalete mini miilla dagooma riqibbinore ikkansanni heeshshote ooltono lede babbaxxitino handaarranni dagooma caacceessitanno assootubba qorqoratenni rahotenni qarrubba tirantannonna qarra kalaqqanno bissa aanano xa’mamaanchimmanna seeru aliidimma buuxisiisate loonsanni hee’noonnita ledde xawissino.
Bakkalcho Badheessa 14, 2015 M.D
