Yaared Geetaachonna Abbebech Maatewoos
Addis Ababa:– HWHT Cancishaanc himmate Mazigabinni kayisa Tigirayete duucha beeqqisiisino yannate geeshshi gashshoote uurrisate kaa’lannota xawinsi. 6ki dagate riqiwamaano Amaale mini 2ki diri 1ki uurrinshu songo bero harisatenni HWHT Cancishaanchimmatenni kaayisate shiqishino gumulshu hedo kiiro 12/2015 roore huuronni kaajjitino.
Farcote Ministirchi geediyoon ximootiwoos(Dr) HWHT Cancishaanchimmatenni kayisa tigirayete duucha beeqqisiisino yannate geeshshi gashshoote uurrisate hende assinanni ledoteno cancishaanchimma kayisa Tigirayete dagara addi addi owaante shiqishatenna baajeettete irko beeqqisiisino yannate geeshshi gashshootira shiqishate kaa’lannoha ikkasi ministirichu qummeessino.
Ministirichu egensiisino garinni; HWHT cancishaanchimmatenni ka’anno woyte keeru sumiimme loosu aana hosse gooffino yaa dikkino. Konnira qote qoteho uurrinsoonni haaroonshu komishiine widoonni HWHT qodhaano manaadda olu uduunne sayisse aatenni Kaampe e’anno gedenna addi addi haaroo’mate qajeelshuwa adhitanno gede assinanni. Uurrinsoonni haaroonshu Komishiine xaa yannara jiro gamba assate aana ikkase qummeessitino komishiine;gattino loossa gumulsatenni keeru sumiimme roore loosu aana hosse suffanno gede filiqqisino. Dagate riqiwamaano amaale mine mootimmate woshshamaancho ministirchi kalaa Tesfaye Beljige shiqishino murote hedo garinni; HWHT xaphooma assootisi cancishaanchimmanniha ikkinohura amaalete mini canchishaanchimmatenni farrajamanno gede murinota qaagiissino.
Piriitooriyu keeru sumuummenni HWHTiha bayiriidi seeri amanyooti gobbaanni ikkitino millimillo suffannokki gede assinoonnita kule; sumuumme harunse xaa yannara HWHT cancishaanchimmatenni kaysa sufote keere dirrisate kaa`lanno yee coyi`rino. HWHT cancishaanchimmatenni kaysate shiqqinoti murote hedo keeru sumuumme gumulshi roorenkanni gumaamo ikkannonna polotiku badooshshubba qajeeltino doogonni tirate kaa`lannoho yinohu kalaa Tesfaye; keereho dinye aa dihasiissanno; keerunniti yanna xaati yino.
Xaphoomu ministirchi dagoomittete hobbaatu amaalaanchi ministirchi ambaasaadder Reedwaan Huseen isi widoonni; xaa yannara Tigrayete babbaxxitino paartubba beeqqisiisino yannate geeshshi gashshooti bissa bande tittirshu hedo adhamooshshe afidhanno gede federaalete mootimmara sonkoonnita buuxisino. HWHT albi cancishaanchimmate assootinni fulte keereho higguro Tigrayete dagarano doorsha aanna qarrubba keerunni tira hasiissanno yeeno coyi`rino.
Wole widoonni cancishaanchimmate muro kayinsiro HWHT wirro ola fanirona yitanno huluullo noonsa bissa no. Gargarooshshu olanto gobba agarate yawonsa hiittenne saaterano gumultanni noohura hiitti yaaddono galtansara dihasiisanno yino. Amaalete mini miilla insa widoonni; keeru sumuumme garinni HWHT qodho tirtino doogonna gumulo lainohunni tittirshu ripoorte amaalete mini miillara shiqikkinni cancishaanchimmate muro kaysate hasaawa assa digaraho; ikkinohurano aantete hajo la“ama noosinkanni yitanno hedo kayissino.
Wolootta amaalete mini miilla qole; sufote keerira yine barshe agurre araarunna mittimmate widira daate HWHT cancishaanchimmatenni kaysate yanna xaati yite hedonsa uytino. Amaalete mini dotteessa 28/2013 M.D harissino 6ki diri loosu dirinni 13ki uurrinshu songo aana HWHT cancishaanchoho yee su`minota qaanganniho.
Bakkalcho Badheessa 14, 2015 M.D
