Abbebech Maatewoos
Hawaasa:- Quchumaho jaddo gargadha dandiissanno tekinolooje horonsi’ra hananfoonnita Hawaasi Quchumi Gashshooti Keerunna Ga`labbote Biddishshi egensiisi. Biddishshu sooreessi kalaa Mekuriya Maa`nisa, Itophiyu pireesete uurrinshara xawisino garinni; quchumu giddo kalaqantanno jaddo gatisatenna gargadhate dandiissanno tekinolooje horonsi’ra hananfinkunni danchu gumi leellino.
Ikkinohura, quchumu gashshooti jajjabba mootimmate uurrinshubbara, baankete qooxeessira, quchumaho qara qara dooggara, uurrinshubbatenna qarrubba leeltanno bayichubbara kaamera qansanni hee`noonnita egensiisino. Tekinolooje halashsha dandiiniro jaddo shotu garinni gatisa daniinanni yaannohu kalaa Mekuri; yannaasincho tekinolooje keerunna ga`labbote loosira assitanni noo kaa`lo jawa ikkitinota xawisino.
Tini tekinolooje baca mannu wolqa hasiissukkinni jaddubba gatisatenna xa`mamooshshe kalaqate ragaannino kaa`litanno yiino.Daga keerunna ga`labbote aana beeqqitanno gedenna keeru ayidde ikkatenni yawonsa fultanno gede assinoonnitano xawisino. Keerunna ga`labbote biddishshi sooreessi kalaa Mekuriya Maa`nisi xawishshi garinni; quchumu ga`labbo buuxisate keeru amaale mine amaaltannore, ambaasaadderoota, gobbate geerranna amma`note foreme tantanne ga`labbote illacha uyine loonsanni hee`noonni.
Ledoteno, sae sae quchumaho leellannoha seerimale assootenna moora xawo fushshate dagate ledo mittimmatenni loonsanni akata kalanqoonnita xawisinohu sooreessu; dagate beeqqonni keere buuxa dandiinoonnino yiino. Quchumu giddo ayimma kaima assitino gibbo dino yiinohu sooreessu; konni quchumi giddo 465 ikkitanno amma`note uurrinshubbanna 86 daganna dagoomi mimmitu ledo ayirrisante, baxamatenna, taalo dikki’ratenninna tirfiratenni hattono mimmitonsa xiibbukkinni heedhanno gede ga`labbote tantano uurrinsoonnita xawisino.
Keeru aliidimma ayirrisiisate amma`note minnara, daddalu dagoomira, mootimmatenna mootimmannita ikkitinokki uurrinshubbaranna teessaanote aana loonsanni loosinni quchumu keere buuxa dandiinoonnita coy`rino. Quchumaho nooti ga`labbote tantanno dagate ledo mittimmatenni loossannota ikkasenni jaddo efi’re giwanno dagooma kalaqa dandiinoonnitaati kalaa Mekuri lede xawisinohu.
Bakkalcho Badheessa 7, 2015 M.D
