Yaareed Geetaachew
Addis Ababa: Sidaamu qoqqowi 2014 MD 12 kifile gobboomu Fonqolo adhite jawa bixxille borreessiissino Rosaanora afamishshanna baraarsha baraasino. Afamishsha aate bare aana leellinohu Sidaamu qoqqowi pirezidaantichi kalaa Desta Ledamo Rosaano uyinoonninsa gobboomu fonqolo moorunni co’o yiino garinni borreessiissino guminni hagiidhinota xawise Rosaano hawalle tashshi yii’ne yiino.
Sidaamu Qoqqowira 100 ali jawiidi 2ki dirimi Rosi minna noohano ikkiro; manaado rosaano calla guma borreessiissinota qummeesse; Rosu handaari hajo la’annonsa bissara bacu dinyi loosi agaramannonsata qaagiissino. Woyyaawino guma borreessiisse Yuniversite e’anno Rosaano gobbate hexxo ikkansanni Yuniversitete keeshshonsanni woyyaawino guma abbitanno gede loossara sokkasi sayisino.
Rosu Biiro sooreessinna Qoqqowu layinki pirezidaantichi kalaa Bayyani Baraasihu isi widoonni;Rosu latishshaho safo ikkasinni qoqqowinkera rosu hiiqqamme sissatenna isilanchimma buuxisate tayixe haaruu garinninna kakkaooshshinni dagooma beeqqisiinse loonsanni hee’noonnita xawis;e tayixe rosaminokki garinni 12 kifile fonqolo moorunni co’o yiinoha assate Yuniversitubbate fonqolantine umi’ne guma borreessidhinoonni rosaanora afanmishshunna baraarshu hasiisanno’ne yiino. Ledoteno kalaa bayyani;umi’ne guminni borreessiissinoonni bixxille martinanniinni Yuniversitubbara dancha guma borreessiissinannita naqqassanno yaatenni martiniwa baala gobba woshshiishshinanni jawaata rosaano ikkitinanni gede halcheemmo yiino. Barraho rosaanote calla ikkikkinni jawaata rosu minnarano Afamishsha uyinoonni.
Bakkalcho Badheessa 7, 2015 M.D
