Qiddist Gezaheny
Addis Ababa:- Xaphoomu Ministirchi Dr Abiy Ahimed techo borrosi mine Ameeriku Gobbaydi Hajo Ministirchi Antooni Bilinkeni ledo hasaawino. Hasaawinsano, babbaxxitino gobbate giddo, qooxeessu, hattono lamooshshu hajubba aana illachishinoha ikkanna; Itophiyunna Ameeriku mereero noo xaadooshshe kaajjishate ragaannino sumuu yitino.
Itophiyu keeru sumimme ragaanni borreessiissino gumi adhamooshshe afi’rino. Wole widoonnino, miinju, latishshu wo’naalshubba, baxxinohunni giwirinnunna gobbate qooxeessi ga’labbo ga’anno gede assate loossarano illachinshoonnitano Xaphoomu Ministirchi borro mini xawisino. Mootimmatenna HWHT mereero assinoonni keeru sumimme gumulantanno gede Ameeriku wo’munku handaaari irko assate qixxaawinoha ikkasi Itophiyaho loosu towanyo assanni afamannohu Ameeriku Gobbaydi Hajo Ministirchi Antooni Bilinkeni coyi’rino.
Faajjete loosu towanyora bero Addis Ababa einohu Ameeriku Gobbaydi Hajo Ministirchi Antooni Bilinkeni; Xaphoomu Ministirchi Abiy Ahimedinna Laynki xaphoomu Ministirchinna gobbaydi hajo Ministirchi kalaa Demmeqe Mekonnini ledo hasaawino. Hasaawa harunsinohu Gobbaydi Hajo Ministirchi qaalu sayisaanchi Ambaasaadder Melles Alemi; Lamooshshunna qooxeessu hajubba aana illachishino hasaawa assitinota xawisino. Itophiyunna Ameeriku mereero babbaxxitino halammete handaarra aana safantinota seeda dirra mittimma kaajjishate loossannota buuxissino. Laynkihu Xaphoomu Ministirchinna Gobbaydi Hajo Ministirchi kalaa Demmeqe Mekonnini isi widoonni; Itophiyaho haaro adawunna keeru fooliishsho fa’namase Antooni Bilinkenira xawisasi Ambaasaadderchu coyi’rino.
Keeru sumimme gumulantanno gede assate harinsho mootimma murci’raanchimmatenni loossanni afantannotano lede buuxisino. Wirro qolle gatamarate looso lifixisate mootimma assitanni noo sharro Ameeriku mootimma kaajjishshe irkissanno gede Laynkihu xaphoomu Ministirchinna Gobbayidi hajo Ministirchi Kalaa Demmeqe xa’masino qaalu sayisaanchi kulino. Itophiyunna Ameeriku halamme woyyaawino deerra iillishate mootimma murciraancho ikkase buuxisino. Ameeriku Gobbayidi Hajo Ministirchi Antooni Bilinkeni isi widoonni; keeru gumulo harinsho danchu akati aana afantannota qummi asse; roorenkanni kaajjitanno gede Ameeriku mootimma assitanno irko kaajjishshe suffannota buuxisasino lede qummi assino.
Itophiyu woloottu gobbuwa ledo halamatenni Somaaliyaho keere halashshate, Somaale Laandete qarra tiratenna Wodiidi Sudaanera labbanno sharro assitanni afantannota coyi’rino.Muli yannanni Xaphoomu Ministirchi Dr Abiy Ahimed; Wodiidi Sudaanera assino towaanyo lawishshu gede kayisino. Ameeriku Gobbayid Hajo Ministirchi Antooni Bilinkeni Itophiyu qooxeessaho keerunna ga’labbo dagganno gede assanni noo sharro Ameeeriku illacha uyte la’annotanna jawaachinshannita ikkase xawisasi Ambaasaadder Mellesi coyi’rino. Itophiyu Somaale Laandetenni daggino daramaano haa’ranni nooti galatisiisannosi assote ikkinota kayisino.
Bakkalcho Badheessa 7, 2015 M.D
