Amsaalu Felleqe
Addis Ababa:- Lakkote quchumira sasente eote bu’anni sai bocu diri giddo mixote aleenni eo gamba assa dandiinoonnita Quchumu Eote Biilloonyi egensiisi.
Lakkote quchumi Eote biilloonyi sinu borro mini sooreessi Kalaa Birru Made, Itophiyu Pireesete Uurrinshara xawisino garinni; quchumaho deerra ‘A’, ‘B’na ‘C’ giwiru baataanowiinni mixote aleenni eo gamba assa dandiinoonni.
Eo hafanfartukkinni gamba assatenni dagoomaho hasiisanno latishsha halashshate loossara hosiisate handaarunni mooranna baincho assate gargarate loossa kaajjillunni loonsanni hee’noonnitano qummeessino.
Sai 2014M.D baajeettete dirira 37.1 miliyoone birra eo gamba assate mixi’ne gumulloonniha ikkanna; tayxe 2015M.D kayinni gamba assate mixi’noonnihu 55.7 miliyoone birri giddonni umikki boci dirira calla 31 miliyoone ale birra eo gamba assa dandiinoonnita kulino.
Konni giddonni dirunniti ganyete (madawanya) eo 47.7 miliyoone birra ikkanna; bocu diri mixo 26.6 miliyoone birri giddonni 23.5 miliyoone birra uurrinshu eonni gamba assa dandiinoonni. Kunino bocu diri mixonni xibbuunni 112% gumulloonni.
Gattino yanna giddo diru mixo garunni gumulateno kaajjillunni loosa agarrannita coyi’rinohu kalaa Birru; baxxinohunni darrasanyuwa qorqorate, deerra lossate hattono giwiru baataano yannitte hayyonni maashiinetenni horoonsidhanno gede owaatamaanono darrasanyunni dikkidhanno gede assate loonsanni hee’noonni yiino.
Lakkote quchumira xaphoomunni 1028 deerra C giwiru baataano nooha ikkanna kuri giddonni tayxe dirinni kiironsa 80 ikkitannore deerra Bna A widira lossinoonnitano sooreessu xawisino.
Quchumaho xaa yannara daddalaano yannitte hayyonni 33 maashiine horonsidhanni afantannoha xawisinohu kalaa Birru; ledotennino 25 maashiine hirreenna owaante uytanno gede assinanni hee’noonnita qummeessino.
Maazzagaajju eo lainohunni diru mixo 8 miliyoone birra ikkanna; sai umikki boci dirira 4.4 miliyoone birra eo gamba assa dandiinoonniha ikkanna kunino bocu diri mixonni xibbuunni 111% gumulloonnita xawisino. Maazzagaajju eo sai diri labbanno yannanni ledo heewisiinsanni woyte 1.3 miliyoone birri badooshshi leellinotano coyi’rino.
Maazzagaajju eo mixote aleenni gamba assinoonniha ikkirono Lakkote quchumi garinni kayinni mixo ajjinota ikkase keennoonnitano xawisinohu sooreessu; mixo wirro haaroonsatenni diru mixo 12 miliyoone birra maazzagaajju eonni gamba assate loonsanni hee’noonnitano egensiisino.
Bakkalcho Ammajje 30, 2015 M.D Hamuse
