Abrahaam Saamueel
Hawaasa:- Hawaasi Quchuma teessaanotenna investimentete injiinoha assate hananfoonni pirojektuwa danchu garinni jeeffanni noota Quchumu Gashshooti egensiisi.
Quchumi Gashshooti Kantiiwichi Ka/Pirofeserchi Tseggaye Tuke Quchumunna Xintu Latishshi Ministeere qixxeessitino 2015M.D bocu diri keeno battalara coy`ranni; Hawaasi Quchuma teessaanotenna investimentete injiinoha assate duucha pirojekite hananfoonnita kule, tini pirojektuwa danchu garinni gumulo afidhanni noota xawisino.
K/Pirofeserichi, “Hawaasi Qucumi soorrotenna Jireenyu hattono Itophiyu daga baala mitiimma xaaddunsakkinni heedhanno keerunna atootu lawishshi quchumaati” yiino.
Hawaasi Quchumi heewisamaanchonna dooraminoha assate; Jireenyu doogonna mixo harunsine haammata loossa loonsanni hee`noonnita buuxise, turizimete, investimentete hattono hee’rate injiinoha qoleno Itophiyu daga dagge teessanno quchuma assate konne diro hashsha barra haammata loossa loonsanni keeshshinoonnita xawisino.
Baxxinohunni, Xaphoomu Ministirchi worino faasho garinni wiinamunni loonsanni pirojektuwa quchumma biifisate looso lawishsha assine adhatenni, quchumaho haaro ajuuja amande seerimali loossa quchummu giddonni hunatenni, quchumu pilaane agaratenni haammata loossa loonsoonni.
Hawaasi Quchumi mudukkira woy mereeroho 6 hekitaare ikkitanno seerimalu doogonni amandoonni baatto qolatenni, quchuma biifinohanna mannu oososra injiinoha assate Quchumu gashshooti jawaata looso loosinota Kantiiwichu buuxisino.
K/Pirofeserichi xawishshi garinni; Quchumu turizimete dhukasi lossaatenna yannicha ikkanno gede assate, Taaboori ilaali pirojekte, Geeti Hawaasinna Gudumaalu latishshi pirojekte, hattono quchumu ga`labbonna wolootta owaante yanneessate kaa`lannoha hobbaatu kaameera (security camera) diriirasete loossa danchu garinni loosantanni noota coyi`rino.
Quchumu giddo lekkaasinehonna shalleetete injiitanno doogo loonse gama gumulo iillinshoonnita kulinohu Kantiiwichu; quchummu paarkuwanna woloottano danchu garinni loonsanni hee`noonni loosooti yee buuxisino.
Xintu latishshi loossano quchuma yanneessate loossa hattono Hawaasa biifinohanna seesallicha assate Quchumu Gashshooti hixamanye loosanni noota huwachishino. Tini Quchumu giddo hananfoonniti latishshu loossa pirojektiwa quchumu lophote aana nooha ikkinotanna albillichono konne kaajjishe sufannota leellishanno yiino.
Hawaasi Quchumi tenne yannara haammata gobbate deerrinni qixxaabbanno hasaawu konforaanse mereersha ikkinota buuxisinohu Kantiwichu; quchumu gashshooti dagge caa`lite daa”atte hadhanno wosinnanke aana mitte mitiima iillitukkinni qaensara higganni noota xawisino.
Bakkalcho Ammajje 30, 2015 M.D Hamuse
