-Uurrinsha Meyaa Loosaasine Horonsiraanchimma Lossate Loossanni Afantanno
Qiddist Gezaheny
Addis Ababa:- Itophiyu Pireesete Uurrinsha losaasinenna massagaano techo ayirrinsanni hee’noonniha kalqoomu meentu barra uurrinshate deerrinni addi addi qixxaawonni ayirrissino.
Loosaasinenna massagaano kalqete 112ki na Itophiyaho kayinni 47ki yannara ‘’Ani rodoo’ya agaraanchooti’’ yaanno massagote qaalinni ayirrinsanni hee’noonniha kalqoomu meentu barra uurrinshate deerrinni 8ki yannara borreessammetenna kiirotenni Meento ayirrisatenni barra qaange honsoonni.
Barraho meyaa loosaasine meyaa odeessaanonni calla qixxaawino Gaazeexa maassiissino. Lawishsha ikkanno meenti rosicho beehate qixxaawote aana Addis Ababu Yuniversite 4 kiilo Diine dokter Addisalem Abbathun koyisante qaaqqimmatenni kayisse techo geeshsha sayissino doogonna seyoote harinsho ayyaanu beeqqaanora beekkino.
Ayyaanu aana hasaawa assitinoti uurrinshate layinkiti qara loosu gumulshaancho dukko Helen Iskindiriti; baalunku meenti jawaatu amuwi gumaati; konnira massagote qaali gede mittu mittunku wolootu roduuwinkera agaraanonna irkisaano ikka noonke yitinno.
Uurrinshate wo’munku handaari hajubba goli sooreette dukko Birhaane Demmeqeti ise widoonni; uurrinsha mannu aana illachishshino soorro assasenni meyaa loosaasine babbaxxino garinni horonsiraano ikka dandiitinota kayisatenni galata shiqishshino.
Aanteteno meyaa loosaasine tungoonninsa yawo roortino murciraanchimmanni loosatenni hananfoonnita uurrinshu soorrote harinsho sufisiisanno gede eeggo yitinno. Uurrinshanniti meyaa loosaasine layinki qara loosu gumulshaancho Dukko Helen Iskindiriti uurrinshate giddo assitanni noo gummaamu massagooshshinna loose loosiisate sharrora afansha uyinoonnise.
Itophiyu Pireesete Uurrinsha qaru loosu gumulshaanchi kalaa Geetinnet Taaddesehu; ‘’Ani rodoo’ya agaraanchooti’’ yaanno meentu barra korkaata assatenni sayisino sokkanni; Itophiyu pireesete uurrinsha uurrinshate giddo afantanno meyaa loosaasine taalo horonsiraanchimma buuxisate, massagaanchimmate qeechinsa luphi yaanno gede, meyaate duhano shotisanno sagalimmate hasiisanno uduunne labbino owaante shiqishatenni, qaaqquullu hoshsho injeessatenni, xaphoomunni wo’munku handaari horonsi’raanchimma buuxisanno looso loonsanni hee’noonnita egensiisino.
Kalqoomu meentu barra ayirrisate aleenni taalo ikkitinota meentu beeqqo aana loosa hasiissanno yitanno ammana noosita qummi asannohu kalaa Getinneti; uurrinshate deerrinni meentu jawa massagooshshu deerra iillanno gede loonsanni hee’noonnitanna
xaa geeshsha loonsoonni loosinni 35 anga xibbuunni iilla dandiinoonnita huwachishinno. Kuni ikkado ikkinokkitanna uurrinshate giddo meyaa massagaano 50 anga xibbuunni iillishate sharro assinanni hee’noonnita huwachishinno.
‘’meentu gobbate gatamarshi harinsho aana luphiima qeecha afi’rino. Dagoomittete, miinjunna poletiku millimmo giddo meentu no. muli barrinni ayirrinsoonniha Adiwu qeelle ayyaana la’niro qeelle borreessantanno gede meentu fulino qeechi jawaho’’ yinohu kalaa Geetinneti; xaano ikkiro gargarooshshu olanto giddo gobbate qacce madde ayirrisiisate diramino meenti jawaho. Konni daafira meentu beeqqinokki millimmo gummaame ikkitara dandiitannokkita duuchu daninni buuxa dandiinannita xawisino.
Ayyaana korkaata assatenni diru dirunkunni meyaa odeessaanonni qixxaawe niwaawete shiqannohu Addis Zemeni Gaazeexi kaajje sufinotanna jawaachinshanniha ikkasi xawisinohu kalaa Geetinneti; togoo budi rosama konni aleenni kakkaanno gede hattono dhukansa leellishanno gede kaa’lanno gede hendoonniho ikkinnina uurrinshu Gaazeexi giddo shiimunni kayise jawu geeshsha meentu nookkihura ikkinokkita huwachishinno.
Uurrinshate giddo massagaanonna gumulaano ikke loosannori; jawaachinshannirinna galatama hasiissannonsa meenti hee’ransaati qaru loosu gumulshaanchi qummi assinohu. Kalqoomu meentu barri, meentu qoossonsara sharramino dhagge amadinoha ikkasi coyi’re; mootimmate deerrinnino illacha tungoonnihanna baxxinohunni xaphoomu ministirchi dokter Abiy Ahimedihu konni alba hasaawunni sa’’e loosunni leellishinota xawisino.
Bakkalcho Ammajje 30, 2015 M.D Hamuse
