Qiddist Gezaheny
Addis Ababa:- Pirezidaant Sahileworq Zewudeti 2015 M.D kalqoomu meentu barra lainohunni sokka sayissino.
Sokkasennino “Gobbankeranna wo’mante kalqera afantinanniri Itophiyu meenti hawalle kalqoomu meentu barrira keerunni iillishinonke’’ yitino.
Duuchanka woyte yineemmonte gede meentu barri dirunni mitto barra calla qaanganniha ikkikkinni 365 barra loosu aana hosa noosi yitannoti pirezidaantitte; sainoha, hee’nanni hee’noommohanna albillittete meentu taalleenya, horonsi’raanchimmanna mannu ooso qoosso garinni la’neemmo gede qaagiissannonkehonna baqqeessankeeti yitino.
Meentu aana iillitanno mitiimmanni fulate qara hajo meentu tantano ikkase kayisse; qoossote sharro calli sharro ikkitinokkihura meentu kaajjado gutu illacha amada noonsa.
Meentu hajo dagate hajo ikkitanno gede loosannohu, tiro hasannohu, gobba giddonna gobbaanni heedhannori rosichonna egenno noonsari Itophiyu meento konni illachira qineessannohu kaajjadu maamari hasiisannota qummi assitino.
Afriku gobbuwa ledo noonke xaadooshshe kaajjishate shoole dirrara albaanni safaminoha ‘’Afriku meentu massagaano waaxo Itophiyu sina kaajjishanna rosichu soorro bowirsa agarantannonke’’ yitinno pirezidaantitte.
Konne meentu barra lainohunni sainoha keenneemmo gede, techoha jawaante loonseemmo gedenna albillitte mixi’neemmo gede uurrine hendeemmo gede baalanko eeggo yaa hasi’reemma yitinno sokkasenni.
Gatamarreemmo Itophiyi meentunna aju seenni meento ikkansanni uminsanni naaxxannota, gobboomu millimmo aana beeqqaano ikkitannota, hedonsa macciishshantannota ikkitanno gede baalunku jawaata noonke yitanni sokkase sayissino.
Bakkalcho Ammajje 30, 2015 M.D Hamuse
