Qiddist Gezaheny
Hawaasa:– Mussinnanna baincho assoote gargarate assinanni sharrora miidiyu qeechi luphiima ikkasi xawinsi.Tenne yinoonnihu Sidaamu qoqqowi amanyootunna tsere mussinnu komishiine sa’u muli lamalara qixxeessitino Miidiyu foreme aanaati. Foremete aana qoqqowunniri handaaru loosu massagaano, ga’labbote bissa, seeru ogeeyyenna miidiyu ogeeyye afantino.
Hasaawu bare aana beqqaanotewiinni addi addi hedo ka’inoha ikkanna; xaa yannara mussinnunna bainchu assooti hala’lanno gede waalcho fantino korkaatta mereerinni halaalaanchonna murciraancho uurrinsha noonsa miidiyubba kaajjisha hooga, mashalaqqe maaxanna yawo adhannohu hoongi qara mitiimmaati. Hattono mussinnu loosamanno qooxeessubba afa hooga, mussinna gargarate miidiyubbate fannoonni waalchi ruukkanna bainchu assooti aana afantino bissa xawo fushshinannikki harinsho mussinnu hala’lanno gede kora ikkitino hajubba mereerinni afantannota kayinsoonni.
Konnirano, mussinnanna moora ittisate hananfoonni looso gummaamo assate murciraancho miidiya kalaqa hasiissanno; hattono uurrinsoonnita mussinna gargartanno gaammo kaajjinshe hendoonni illachira hossanno gede assa hasiissannota gambooshshu aana kayinsoonni.Ledoteno, miidiyubba qacce amaddukkinni daga mereersitinore ikka noonsata kayinsoonni. Barete aana afante hasaawa assitinnoti qoqqowu amanyootunna tsere mussinnu komishiine laynki komishinere dukko Zelaalem Lamma coyidhanni; danchu amanyooti gatamarshinna tsere-mussinnu sharro gummaame ikkitannohu baalunku qansooti sharrote aana gobbate gatamarshi safo aana ikkadonna yannate mashalaqqe iillishate huwanyo heedhunsaronna beeqqo assa dandiiturooti yitino.
Qoqqowu amanyootunna tsere-mussinnu komishiine amanyootu rosinna qajeelshu dayirektoreete dayirekterchi kalaa Wonne Hammeesso isi widoonni; mussinnu urdenni ba’annoti mannu lubbo wole gawajjonni aliidita ikkase qummi asse; mussinna ittisate hananfoonni looso guma gansiisate daganniwa iilla dandiitannoti miidiyu uurrinshuwaati yiino. Muli yannara fultino mashalaqqe kultanno garinni, xiinxallo assinoonni 190 gobbuwanni 96ki deerrira afantanno yee; mussinna gargarate widoonni gobbate gede wolootta Afriku gobbuwanni woffi yinoonnitanna lophotenni badhera gatissannonke hajo ikkase coyi’rino.
Konni saalinni fulateno baalunku ragi ragisinni sharramatenni qansichimmate qeecha fula noosita huwachishe; baxxinohunni miidiyu uurrishsuwa tenne hajo gadachote gede assite adhatenni sharrama hasiissannota qaagiissino.
Bakkalcho Ammajje 23, 2015 M.D
