- Xaphoomu ministirchi Abiy Ahimed
Qiddist Gezzaheny
Addis Ababa:- ‘’Luphiima guma borreessiissinoonni rosaano egennonna busulle hasi’ratenni loossiniro ga’a Itophiya gatamartinanni Mahandisoota ikkitinanni’’ yiino Xaphoomu ministirchi Abiy Ahimedi (PhD). 2014M.D 12ki kifile gobboomu fonqolo luphiima guma abbitino 273 rosaanora baraarshanna gobbara hadhe rossanno gede rosu kaayyo uyinoonninsa. Tenne lamala giddo Itophiyu saynsete muuziyeemera harinsoonni baraarshu amanyooti aana Xaphoomu ministirchi coyi’ranni; luphiima guma abbitino rosaano egenno batisse hasidhannore ikka noonsa.
Egennonniwa shiqqi yitini kiiro Itophiyaho calla ikkikkinni kalqete ikkitinanni yiinohu Xaphoomu ministirchi; batinyu egennaammi kalqete ikka dandiitinohu egenno batisse afi’ransanniiti yiino. Egenno hasi’rino manchi keerunni goxe galanno; dancha looso gumula dandaanno. Itophiyu giddo xaa yannara egenno hasi’ra ikkikkinni kaphu su’minni hajo harunsate. Tenne soorritanno hedo amadatenni korkaatu aana safantino harinsho harunsa hasiissanno yiino.
‘’Egennote sharrantinannire ikktiniro kayinni lamenti hajubba mulla afi’nannita ikkitinokkita affine sharro’ne kaajjishshinara hasiisanno’’ yaatenni sokkasi sayisino. Rosu ministirchi pirofeeser Birhaanu Negga isi widoonni; 12ki kifile gobboomu fonqolo aate harinsho aana rumuxxitino mitiimma noota kayise; xaadino qarra gatisara dandaannoha xiinxallote aana safamino looso loonsoonnitanna guma afi’noonnita xawisino. Rosaano taalo ikkino guminni borreessantanno gede kaa’litanno harinsho kalanqe fonqolu moora gatisatenni foonqe diwate dandiisiisanno looso gumulloonnita qummeessino.
Fonqolunni luphiima guma borreessiissino rosaano albillitte gobbanke hexxooti; rosaano hanaffino sharro luphiimu gumira soorra agarantannonsa. Rosu ministereno rosu isilanchimma buuxisate hananfoonni harinsho suffanno yiinohu Ministirchu; jawiidi rosu jeefishshi fonqolo aatenni jawaatanna kalqoomu deerrinni heewisamaano qansoota kalaqate assinanni sharro kaajjite suffannota egensiisino. 2014M.D 12ki kifile gobboomu fonqolo adhite luphiima guma borreessiissino 273 rosaano baraarshi gobbaydi gobbuwa hadhe rossanno gede rosu kaayyo uyinoonninsata xawo assino.
Barraho luphiima guma borreessiissino 20 rosu minnara afanshu tajete woraqatanna baraarsha uyinoonninsaha ikkanna kuri giddonni lamalu wo’munni wo’ma rosaanonsa sayissinoreeti. Hattono barraho rosaanote rosu kaayyonni ledote yannaasincho Laaptoppe kompiwutere baraarsha uyinoonninsa. Xaphoomu ministirchi Abiy Ahimed (PhD) rosu kaayyo garunni horonsirate balaxote qixxaawo assitanno gede sokka sayisino.
Bakkalcho Ammajje 23, 2015 M.D
