Amsaalu Felleqe
Addis Ababa፡- Tayxe 127ki yannara ayirrinsoonnihu Adiwu qeelle barri ayyaani Dhaggete amadooshshesi agarino garinni ayirrisamanno gede agarranni yawo garunni fulinota Albi Itophiyu Bareedda Ejjeetto Maamari egensiisi. Maamaru pirezidaantichi Lij Daaniel Jotte Mesfiin Itophiyu Pireesete Uurrinshara xawisino garinni; Adiwu qeelle Dhaggete amadosi agarinonna iibbino garinni ayirrinsamanno gede Maamaru agarrannisi qeecha fulino.
Techo ayirrisanni hee’noonni ayyaanira Albi ejjeettuwanna maatensa qeellete macciishshamme leellishshanno uddanonsanni biiffe babbaxxitino ikkitubbanni ayyaanu beeqqaano ikkitanni afantannota xawisino. Keere, mittimmanna gobbate baxille xawissannore babbaxxitino sokka wedellaho sayinsanni hee’noonni. Maamaru Adiwu Dhagge ilamate rosiisate ragaanni qeechasi fulanni noota qummeessinohu Albi Itophiyu Bareedda Ejjeetto Maamari pirezidaantichi Lij Daaniel Jotte Mesfiin; mootimmanna dagoomu qeellete ayyaani danchu garinni ayirrisamannonna Dhaggete amadosi noo gedeenni sufanno gede assate ragaanni agarranninsa qeecha fultanni nootano coyi’rino.
Baxxinohunni rosu uurrinshuwa xaaddotenni la’’annonsaha ikkasinni halaalaancho Dhagge ilamate rosiisatenni ledote Dhaggete amado noonsa maxaaffa attamisiisatenna tuqisate ragaanni luphiimu qeechi noonsata qummeessino. Ayyaanu keerunni ayirrisamannaokki gede balaxxe babbaxxitino dagoomitte mashalaqqete xaadooshshinni gurcho ikkitino hedubbanna dagate mereero huluullonna babbadamooshshe kalaqate hedde hunote sokko sayissanni keeshshitinori noota qummeessinohu Maamaru pirezidaantichi; wedellu kayinni hiittenneno hunote bissa macciishsha agurte gobbatenna dagate ayirrinye balaxisiisatenni qansichimmate yawonsa fultanni noota coyi’rino.
Pirezidaantichu xawishshi garinni; Adiwu qeelle ayyaani mittimma kaajjishate ragaanni jawa rosicho aannoha. Amma’note, Afuu hattono ga’renna boosaallimma gaa’lite dagoomu mereero babbadamooshshe kalaqate wo’naaltannori hunote bissa assoote reqecci assatenni gobboomitte mittimma kaajjitanno gede assitannote yiino. Adiwu qeelle gobboomitte calla ikkitukkinni kalqoomunnite yiinohu Lij Daaniel Jotte; wo’munku Afrikunna koliddu daga kadote gashshootinni fushshatenni wolambinatenna taalleenya kalqete rosiisinoha ikkasinni babbaxxitino gobbuwanni daggino wosinnano beeqqitino yiino.
Adiwu qeelle kaajjado gobboomitte mittimma leeltinote. Albi annuwinke mundeensanna miqichinsanni hegeraame Dhagge loosse sa’ino. Tenne qeellete macciishshamme sufissanno loossa gumulama noosetano coyi’rino. Konni albaanni Adiwu qeelle ayyaana ayirrinsannihu Albi Itophiyu Bareedda Ejjeetto Maamari widoonniiti yiinohu pirezidaantichu; tayxe baxxino garinni Gobbate Gargarooshshu olanto hundaanni iibbino garinni ayirrinsanni hee’noonnita coyi’rino. Gargarooshshu olanto maarchi baandenni dukkisame Addis Ababaho Masqalu xawira luphiima mootimmate loosu massagaano leeltinowa techo iibbino garinni tayxe 127ki yannara ayirrisamanni no.
Bakkalcho Ammajje 23, 2015 M.D
