- 324.8 Miliyoome doolaare mixi’ne 115 Miliyoone doolaare afi’noonni
- Seeriweelo dikkonna adawu qarri handaaraho mitiimma ikkitino
Qiddisty Gezaheny
Addis Abeba:- 2015 bejetete diri lee aganna giddo 115 Miliyoone doolaare e’’o afi’noonnita shiilote ministere egensiissu. Seeriweelu daddalinna ga’labbote qarri shiilote handaari aana qara mitiimma ikkansa xawinsoonni. Shiilote ministr dieeti kalaa Miliyoon Maatewoosihu Itophiyu Pireesete Uurrinshara xawisino garinni; Sa’u lee aganna giddo shiilote handaarinni 324.8 Miliyoone doolaare e’’o abbate hende afi’noonni e’’o 115 Miliyoone doolaareeti.
Bocu diri jeefishshi mixote amandoonnihunni 35 anga xibbuunni calla ikkase qummi assinohu minister dieetu; jeefishshu anjera qara korkaatta seeriweelo dikkonna ga’labbote qarra ikkansa huwachishinno. Lee aganna giddo shiilote handaarinni 1 kume 584.14 kg Culka afi’noonni yinohu minister dieetu; kunni giddonni 1 kuminna 121.5 kg culka umme afi’noonnita ikkitanna 462.64 kg Culki kayinni budillaancho doogonni afi’noonnita ikkase xawisino.
Kalaa Miliyooni xawisanni; bocu dirinni ledoteno 76.2 toone Tantaalemete laalcho afi’noonni. Xaphoomunni 41.55 Toone seesu uduunnira horonsi’nanni shiilo afi’noonni.Shiilote handaarinni afi’noonni laalchinni 3 kumi 330 Toone Industirete e’’ora hossanno shiilo ikkansa minister dieetu egensiisino. Shiilote goli miinji aana latissanno investerooti latissanno qooxeessira baattannohu ‘’Royaalitete’’ baatooshshi no; lee aganna giddo Rooyaalitete baatooshshinni 272 Miliyoone Birra e’’o afi’noonni yino.
Ledoteno fajjo fushshatenni, borreessamatenni, haaroonsotenna ogimmate ikkadimma baatooshshinni 970 kume birra e’’o afi’noonnita kalaa Miliyooni lede xawisino. Minister dieetu xawishshi garinni; shiilotenna nadaajete investimente dagoomu mitto’ma bowirsate ledo amadaminohunni shiilotenna nadaajete latisaanonni 14.2 miliyoone birra qooxeessahonna dagoomu latishshira gamba assa dandiinoonni.
Shiilote handaari loosinni lee aganna giddo 89 kume 8 xibbe ale loosu kaayyo kalanqoonni yinohu kalaa Miliyooni; kunni giddonni 1 kume 405 loosu kaayyo kubbaaniyu widoonni; 88 kume 414 kayinni budillaancho shiilote laashshaano interpirayizza widoonni kalaqantinota ikkase xawisino. Minister dieetu egensiisino garinni; shiilote latishshanna umate looso harinsoonni base aana qooxeessu agarooshshenna wirro latisate loosinni lame hektaare baatto wirro qolle latinsoonni.
Shiilo latinsanni qooxeessubbara adawu qarri hee’ra, kubbaaniyuwatenna shiilote latisaano Industirubba dhuku anje, seeru fajjannonsa yanna aleenni angansara Culka amadde keeshshitino qooxeessubba hee’ransa handaaru lopho aana mitiimma ikkansa kalaa Miliyooni huwachishinno. Baxxinohunni culka roore anga latinsanni qoqqowubbara deerra deerranko noo massagaano seeriweelo shiilote daddalo gargarate aana assitanno harunso laafa ikkase minister dieetichu xawisino.
Kalaa Miliyooni xawishshi garinni; shiilote handaari mitiimmubba gatisate ministerete loosu mini, adawu bissa, gumruketenna hajo la’annonsa uurrinshuwa Benishangul Gumuzi, Wodiidi Galchimi Itophiyi qoqqowi, Oromiyunna Gaambeellu qoqqowinni fultino wolqa bobbaasse hala’lado harunsote looso loossanni afantanno. Babbaxxitino shiilo fushshinanni base aana leellannoha ga’labbote qarra tiratenna shiilote e’’o lossate adawu uurrinshuwanna qoqqowubbate gashshaano ledo gamba yine loonsanni hee’noonni yino.
Bakkalcho Ammajje 23, 2015 M.D
