– Abiy Ahime (PhD)
IFDR Xaphoomu Ministiricha
Yaareed Geetaachew
Addis Ababa:-127ki Adiwu qeelle ayyaana lainohunni IFDR xaphoomu ministirichi Abiy Ahimed hawalle iillishi’ne sokka sayisino. Ayyaana lainohunni sokka sayisinohu Abiy Ahimed (PhD) “Baalinkera adda ikkino,baalinkera baraansoonni muxxe baraarshanke Adiwa ayirrado shiilo hururamatenni lai’neemmo;bacurinni babbaxxinammora dandiineemmo;Adiwu kayinni Siiwo ikke xaadisinonke” yaanni barru Itophiyaho qeellenniha calla ikkikkinni baxillunni kuttuwinonkeha ikkasi Coyi’rino.
Itophiyu daga babbaxxino balchooma,babbaxxitino amma’nonna bude afidhinote yiinohu ministirichu, konninnino duucha ragaanni babbaxxitino hasatto heedhannoti addaho giddoyidi hasatto korinni ka’anno kipho annunna beettunnita ikkase buuxise, xaphoomu ministirichi “Baca hajubbanni mimmito lawa hoongeemmo,Adiwu kuulanna suude aatenni lawisiisinonke;bacu coyinni sumuu yaa hongammora dandiineemmo, balaxaano akaakkanke sumuu assiteennanke mittu xawira leellino “Adiwu Qeelle” sumuu assitannonke” yaatenni guwursino.
Adiwu ayyaani jiro sa’u xibbee dirrara harunsite reewantinonke horro,kadote gashshootenna kadote gashshaano gargadhineemmo gede assinonke yiinohu xaphoomu ministirichi;tini jiro babbadamannokki bacu dagoominni,xaaxamannokki mittimmanni kaajjine uurrineemmo gede kaajjishinonketano qummeessino. Adiwu ayyaana gotti assine ayirrinseemmo gede assannonkeri bacu korkaati hee’rirono,qaru korkaati kayinni qeelle baalunkuta ikkasiiti yiinohu Xaphoomu ministirichi Abiy; hiittenne Itophiyu kifillara gaangaanbe la’nummoro adiwu olira beeqqitinokkiri noo baatto di anfeemmo yiino.
Duuchunku dhukisinna bikkisinni mundeesinna hunkeesi duninota, miqicho maalasi kakkalinotanna,egenno dandoosi fushshaato assinota qummeessinohu ministirichu; annuwinkenna akaakkanke togoo waaga baattinohu gashshootu mittimmara,Itophiyimmansa ayirrinyiranna gobbate wolambinatira ikkasino xawisino. Techo naaxxineemmo ayimma,hasiisinke gede ikkineemmo wolapho,hones galleemmo gobba afi’noommohu insa kakkalonni ikkinota buuxisino. Adiwu, bisetenna kabbadunni,urdetenna xiyyitunni,wonqotenna baarudunni assinoonni ola calla dikkino yiinohu Xaphoomu ministirichi, kakkaooshshunna bareende,hayyonna ledama yinanni balchoomi gumi ledameenna ikkinotano guwursino.
Keeraanchimmatenna wolambinatu aana kayinsanni kakkacha qaafo gadadunni ragi’noommo Itophiyi haxo aana fulino buutaami gede qodhine sharrammeemmo;Adiwu gowinonke ayimma tattayisate gamaxantino milaaccuwa hende halammetenni sharrammeemmono yiino. Xaphoomu ministirichi Abiyi yiino garinni,qeelle qaangeemmo woyte shoole bissa qaaga hasiissannonke. Olu massagaano,Olu gaadaano,Olu bareeddanna gaadaanote safo ikkitino daga. Aste Miniliki II na Iteege Xayitu duuchanka Itophiyu daga qineessite addintanni maala’lisanno gaadonna qeelle massagginota qaagano hasiissanno.
“Adiwu qarrunni tatawamme gata dirosiisinonke;kaayyo kiirre jifo sa’’a ikkinniina” yiinohu xaphoomu ministirichi; beronni roore ga’’a aana illachishatenni,duuchankare Itophiyu woroonni assinummoro mittimmanke kaajjinshummoro,gomichu gede gaangeessitinonke jifo baala wiliilete gede billaallite ba’annonna buximatenna gede’nate aana,babbadamatenna beehamate aana Adiwu qeelle wirro lendeemmo yaanni guwursino.
Bakkalcho Ammajje 23, 2015 M.D
