Abbebech Maatewoos
Addis Ababa:- Malga woradira wo`mante fayyimmate mereershubbara ogeeyye irkissannore gaamme loonsanni hee`noonnita Malga woradi fayyimmate borro mini sooreessi kalaa Belay Beqqele xawisi. Konni albaanni Fayyimmate ekistenshinootinna ogeeyyete mereero noo foonqe tiratenni daga islaancho owaante afidhanno gede loonsanni afammannita xawisinohu sooreessu; loonsoonni loosinni gumu leellino gedenna daga uynanni owaantenni horaameette ikkase keentinota coyi`rino.
Borrote mini sooreessi Itophiyu pireesete uurrinshara xawisino garinni; Wotaru Umi Deerri Hospitaalera sa“e sa“e leellanno caabbichu hoongi qarrinni kainohunni owatamaano wolewa hadhe xagisidhanno gede riifere assate gadachante keeshshitino. Konnirano hajo la`anno boordete miilla ledo ikkatenninna Sidaamu dagoomu qoqqowi fayyimmate biiro widoonni 2 miliyoone ali birrinni caabbichu iillanno gede assineenna sa`u lamalanni hanafe loosu aana hossanni noota buuxisino. 6 aganira taxxi yite keeshshitinoti darre gowate owaanteno xaa yannara hanaffino gede buuxisiisino.
Gobbate deerrinni kalaqantino kiphonni kainohunni xagicho bashshoo gede wo`munni wo`ma dagate iillinshanni hee`noonnikkita coyi`rinohu kalaa Belay; hospitaale hattono fayyimmate mereershubba babbaxxino korkaatinni xagicho amada noonsa bikkinni amaddinokkitano xawisino. Xagichu qarra tirate albillicho woradu deerrinni baxxinohunnino wotara rassaho dagate xagichi mine (Public pharmacy) fansiinse daga horaameette assate mixo amandoonnino yiino.
Amadisiiseno amuwu mine ilannokki gedenna qaaqquullu kittiwaatete owaante afidhanno gede, hattono godowinni noo amuwi fayyimmate uurrinshara marte harunso asidhanno gedenna iltanno assate konni albaanni haammata loossa loonsanni keeshshinoonnita qaagiisse; amuwunna qaaqquullu reyo gatisate ragaanni gumaamo looso loonsoonni yeeno coyi`rino. Qoqqowunna woradu deerrinni loonsanni hee`noonnihu amuwunna qaaqquullu reyo gati sateeti yaannohu kalaa Belay Beqqelehu; konni albaanni shoole anga fayyimmate owaante woy harunso assi’ranno amuwi xaa yannara 12ki lamalanni hanafe ila geeshsha sette hige daanno gede assatenni amuwunna qaaqqullu keeraanchimma agarate loosi xibbuunni 74% iillino yiino.
Ledoteno dagooma hanqaffinota fayyimmate wowe hanafate ragaanni woradaho laanfe nootanna daga horaameeyye assa dandiinoonnikki gede coyi`re; tini dagooma hanqaffinoti fayyimmate wowe buxichono dureessano taalo owaattannota hattono owaantete hoonginni mine reytanno daga gatissannota ikkasenni konne diro baxxino illacha tunge loonsannitaati xawisinohu. Konnirano miila ikkanno yine hendannihu 22 kume 6 xibbe 62 manna ikkanna; xaa geeshsha 15 kume ale ikkanno manna miila assine tenne owaante aate qixxaawo assinoonnita kule; konni albaanni daganke tenne owaante afidhukkiinni keeshshase gaabbissannota ikkasenni aantanno yannara dagooma hanqaffinota fayyimmate wowe owaante aate sharrammanni hee`noonnita kalaa Belay Beqqele lede huwachishino.
Bakkalcho Ammajje 16, 2015 M.D Hamuse
