Gaazeexu Odeessaanchinni
Addis Ababa:- Biiro 2015 bajeettete diri 6 agani loosu gumulshi keenonna qoqqowunnita fayinaansete amanyoote yannicha (online) hanafisiisate bare harissino. Sidaamu qoqqowira 48 uurrinshuwa womaashshu amanyootensa onlaynete amanyootinni horonsi’ra hanafisiisate loosi feeffatinota xawinsoonni. Aantanno agannara elekitiroonikisete hidho hanafisiisate balaxote qixxaawo assinoonnitano Qoqqowu womaashshu biiro egensiissino.
Biirote sooreessi Araarso Gerremew (PhD) xawisino garinni; qoqqowoho yannitte hayyonni (online) womaashshu amanyoote hanafamasi mooranna baincho assoote ajishate luphiima qeecha afi’rino. Tini hayyo hanafamase dagoomaho woyyaabbinonna lifixa owaante aate kaa’litannotano coyi’rino. Tini yannitte tekinolooje xaa yannara qoqqowoho afantanno 48 uurrinshuwara faajjetenni hanafantannoha ikkanna; aananno baajeettete dirira kayinni gattinori 55 uurrinshuwara hanafate mixi’noonnitano egensiisino.
Qoqqowu mootimma Faynaansete biiro sooreessi Araarso Gerremew(Dr), Sidaamu Qoqqowo miinjunni lophinohanna jawaata assate rakkinota, lifixanna isilancho owaante dagate uyinanni keeshshinoonnita xawisino. Jiro hafanfartukkinni dagate horora calla hossanno gede assanno looso loonsanni keeshshinoonnitano kulino. Gaamooshshunna garafote egensiishsha konni gedensaanni fannoonni webisayitera calla xallinannitanna onlinete hirono hattonni hananfannita egensiisino. Hidhote harinsho woyyeessate wodho kalanqe loonsanni hee’noonnita xawisinohu sooreessh,odiitete loossa widoonni kalaqantanno foonqe taashshate fooreme kalanqe loonsanni keeshshinoonni yiino.
Harunseno loosu rippoortenna xiinxallote borro shiqqinoha ikkanna rippoortete aana bafanfartino dagate jiro 8 miiliyeene birra qolsiinsoonnihano ikkiro; higino woxe hosinowa anfoonnikki daafira doogiweelowa hosiissinore harunsine qaafo adhinanni yiino sooreessu. Xiinxallote loosinnino haammata woraddara diru giddo mitto ogeessa 3 hinge deerra lossa,gaammikkinni su’ma worre damooza itanna nookki madawenna damooza kalanqe hanaaqa hala’ladunni leeltannota iillinoonni.
Rippoorte kaima assinne hasaawa assinoonniha ikkanna Qoqqowu faynaanse loossanni noo loosinni soorro dagganni noota hasaawu beeqqaano xawissino. Woraddatenna quchummate leeltanno miinju hafanfarre gargaranna gatisa mittu bisira calla tungikkinni mitteenni sharramme tirate jawaata hasiissanno yitino beeqqaano Dagate miinji aana gawajjo iillishshanni noo mannootira harunso assine rosiissanno qaafo adha hasiissannono yitino.
Bakkalcho Ammajje 16, 2015 M.D Hamuse
