Amsaalu Felleqe
Hawaasa:- Sidaamu qoqqowira rosaanote gumi umbera korkaatta ikkitino qarrubba badatenni deerru deerrunkunni noo rosaano woyyaawino garunni gamba assa doorshu nookki hajooti yiino. Gamba assinoonni eo garunni mixi`noonni loosi aana hosasenna hoogase Mootimma guma abba dandiitanno gede assate addi illacha tunge loonsannita Qoqqowu Rosu Biiro egensiissu. Qoqqowoho sai diri 12ki kifile gobboomu fonqolira maareekkisiinsoonni gumi woffi yinoha ikkasira korkaatta ikkitino qarrubba badatenni rahotenni tirate dandiinanni hayyo lainohunni hajo la’annonsa bissa hasaawunna amaalammete bareno sa’u muli barrubba giddo Hawaasi quchumira harinsoonni.
Qoqqowu layinki pirezidaantichinna Rosu biiro sooreessi kalaa Beyyene Baraasi tenne yannara coyi’ranni; sai 2014M.D qoqqowoho 53 kumi ale ikkitanno rosaano 12ki kifile gobboomu fonqolo adhiturono woyyaawino guma abbitinori xibbuunni 2.4% ikkitannori callaho. Rosaanote gumi umbera korkaatta ikkitino qarrubba badatenni albillicho rosaano woyyaawino guma maareekkisiissanno gede assate harinshora ikkanno garinni balanxe xiinxallotenni loonsanni hee’noonnitano xawisino.
Rosaano balaxote rosinni hanaffe daggino doogga 12ki kifile gobboomu fonqoli gumi woffi yinoha ikkanno jawa korkaata ikkinota xawisinohu Biirote sooreessi; rosu minna deerransa agartinore ikka hooga; rosaanote kakkaooshshinna bilchaante ajjinota ikka; rosu loossa murci’raanchimmatenni massaga hooganna rosiisaanote anje jawu korkaati gede bandoonnire ikkansa qummeessino. Rosaanote guma la’ni gedensaannino aananno deerru deerrunkunni rossanno rosaano woyyaawino guma maareekkisiisa dandiitanno gede kaajjado irko assa; fonqolu moora gargara; rosu minna deerra woyyeessa; rosiisaano rosaanote gumi woyyaawanno gede annimmatenni yawo adhite loossanno gede assa hattono rosu ogeeyye kaajjado irkonna harunso assitanno gede illachiinshe loonsannita egensiisino.
Konni albaanni rosaminohu kiironsa baca rosaano fonqolo moorte sa’’atenni yuniversite e’annotanna e’ino yuniversitubbarano keeshshitukkinni fultanno harinsho nootano hasawawu beeqqaano kayissino. Kunino, gobba ikkadimmanna bilchaante noonsare mannu wolqa kalaqqannokki gede jawa jifo ikke keeshshinota xawinsoonni. Rosaanote rosu gumi umbera kaima ikkitino korkaatta xiinxallotenni badatenni rosaanote rosu guma woyyeessate amandoonni mixo guma abbitanno garinni loosateno Hawaasi yuniversite lede woloottano jajjabba rosu uurrinshuwa agarranninnsa qeecha fultanno garinni qinaambe loonsanni hee’noonnitano tenne yannara xawinsoonni.
Hasaawu barera qoqqowoho baalante woradda rosu borrominna sooreeyye; woraddatenna quchummate gashshaano; jajjabba rosu uurrinshuwa massagaanonna rosu ogeeyye hattono hajo la’annonsa bissa beeqqitinoha ikkanna; rosu isilanchimmanna rosaanote guma woyyeessate loosi yanna uynikkinni loonse hasi’nanni guma borreessiisate baalunku agarranninsa qeecha fultannotano barete beeqqaano coyidhino.
Bakkalcho Ammajje 16, 2015 M.D Hamuse
