– Qoqqowu 2015 Bocu Dirira 3.8 Biliyoone eo gamba assinotano xawisino
– Desta Ledamo Si/Qo/Pirezidaante
Abrahaam Saamueel
Hawaasa:- Sidaamu Dagoomi Qoqqowi Eote Biilloonyi 2014M.D 29 qaddo giwiru baataanora boowetenna afamishsha aate pirogiraame harisino. Battalate leellinohu Qoqqowu Pirezidaanctichi Kalaa Desta Ledamo coyi`ranni, “Ammanamatenninna seer fajjanno doogonni loossine afidhinoonni jironni Mootimmate ikkitanno eo eessatenni qansichimmate qooda`ne fultinoonni daafira mootimma wodaninni galattanno`ne” yiino.
“Mootimma daga hasidhannota latishshu xa`mo garunni dawarate dandiisiissannose harunsitanni xa`mitanni qorichishshanni noota kulinohu Pirezidaanctichu; daga mootimmate qote uurrite mooraano reqecci assatenni kaa`litara hasiisannotano woxaratino. Mootimma dagate latishsha loosatenna ga`labbo agarate womaashshu hasiisannota xawisinohu Pirezidaanchu; gamba assinoonni woxi loosu aana hosinotanna hosinokkita giwiru baataano xa`mate qoosso noonsata affe Mootimma loossanno looso harunsanna qorqora hasiissannotano coyi’rino.
“ Qoqqowu Eote Biilloonyi Qaru Dayrekterichi Kalaa Haylu Giduri isi widoonni; Qoqqowu Mootimma loosate amaddino mixo halaalaancho ikkitannohu eo garuni gamba assiniro ikkinota huwachiishe; barrahono ammanamatenni giwirensa yannatenni baatte qaddo ikkitinori giwiru baataano woloottahono lawishsha ikkansanni jawaachinsannireeti yiino. Sai 2014M.D mootimma gamba assate mixidhinohu 5.5 Biliyoone birra ikkinota qaagiissinohu Qaru Dayrekterichi; gamba assinoonnihu 6 Biliyoone ikkinota buuxisino. Kunino mixi`noonni mixonni aleenniiti. Giwiru baataanonna deerru deerrunkunni qeechansa fultino dagahu qeechu jawaho yaanni guwuursino. Giwirensa baatte gobboomu gadacho fulatenni; Qoqqowunni sa’e gobbate lophoranna jireenya riqiwa dandiinanni qeecha fultanni noo daddalaanonna dagoomu bissa taakisete seeri safaraano garinni wo`munni xea woyyitinore ikkatenni Qoqqowu deerrinni uynanni afanshanna baraarshira ikkadda ikkitinoreeti yiino.
Kalaa Hayilu xawishshi garinni gobboomunna qoqqowu deerrinni gamba assinanni eo gobbate xintu latishsha loosate calla ikkikkinni taaloo ikkino eote beehaachi hee`ranno gede assate hattono eote mixo fulote mixo ledo taalte hadhanno gede doogo biifisatenni gobbannita fiisiikaale poolise massagatenna wolootta pooliissa ledo waaxante hallanyu miinji handaarra baqqi assate dandiisiissanno doogo ikkase huwatatenni qoqqowoho miinju burqanno eo mucci assine gamba assate jawaante kalaqannoho.
Barraho 29 qaddo giwiru baataano Pirezidaantichu anganni afanshanna boowete baraarsha adhitino. 9 miliyoonenni kayisse 51 miliyoone geeshsha eo baattinore 1-3 geeshsha noo qaddo giwiru baataano kayinni baxxino baraarsha “Green Card”/ Haanja Kaarde/ adhitino. Kaardeno Mootimmate biirora balaxo uynanninsa gede dandiisiissannota ikkitinota xawinsoonni. Tayixe bocu dirinni Qoqqowoho 3.8 biliyoone birra gamba assa dandiinoonnitano barraho faajje assinoonni.
Bakkalcho Ammajje 16, 2015 M.D Hamuse
