Mootummaa Gumaay (Gumaa)

Kutaa Xumuraa

Dubbistootaa, barreeffamoota torban lamaan darbanitti seenaa mootummaa Gumaay yookiin Gumaa isin dubbisisuun keenya ni yaadatama. Kutaa xumuraa kanaanis kufaatii mootummaa Gumaayiifi taateewwan isa booda kan dhiheessinu ta’a; dubbisa gaarii.

Erga Raas Adaal Tasammaa Abbaa Joobirifi Abbaa Foggii ajjeese booda  waraanni  Raas Goobanaa Daacciifi Raas Tasammaa ari’ee, Gumaay qabate. Yeroo sanatti Haliimaan booji’amtee gara Finfinneetti fudhatamte. Masaraa Miniliikitti haati warraa Miniliik Xaayituun kirstinnaa ishee kaasistee, Raas Tasammaa Naadoo akka ishee fuudhu goote. Maqaa kirstinnaa Haliimaa Abbaa Foggiis Balaxshachoo jedhamuun jijjiirame. Isheenis booda biyyi abbaashee akka kennamuuf Raas Tasammaan akka haala mijeessu taasifteetti. Raas Tasammaanis yaada kana fudhatee Dambiitti teessoo isheef hundeessee ofii immoo gara dhihaa Goreetti wiirtuu hundeeffateera. Haala kanaan Gumaay akka Haliimaa Abbaa Foggii (Balaxshachoo)tiin qabiyyee ‘maadbeet’ ta’uuf taasifame. Raas Tasammaan daangaa Gumaafi Iluu walitti qabuun akka bulchiinsa tokko jala oolu taasise. Maqaan daangaa bulchiinsichaas maqaa mootii Caalii Shoonoo ittiin waamamu Iluu Abbaa Boor jedhee waamuun moggaase. Du’a Raas Tasammaan boodas Balaxshaachoon Raas Mulugeetaatti heerumtee qabiyyee Gumaa irra turteetti. Balaxshaachoon Raas Tasammaafis ta’e Raas Mulugeetaaf hindeenye. Kanaaf du’a ishee booda qabiyyee ishee Li’uul Mokonnoon ilma mooticha Haayila-Sillaaseetu dhaale.

Kufaatii Mootummaa Gumaay booda amantiin kiristaanaa waan biyya fudhateef ummanni hubaatii isarra ga’e akka armaan gadiitti akka weeddisaa (seeneessaa) ture ni dubbatama.

           … Yaa ilmaan haadha walattee

          Shawaadha wal-harattee

          Achumaa nutti godaante.

          Barcuma keenya guddaa

          Guutuu mana godhattee

          Farda keenya gurguddaa

          Baata ofii godhattee

          Warra keenya gurguddoo

          Beeraa/garadii/godhattee

          Jarreen keenya gurguddoo

          Duutu namaa godhattee

          Yaa ilmaan dana daruu

          Matuu an sigabbaruu

          Daaraa mataatti si haa aruu …” jechuun aariifi hubaatii isaanii akka ibsaa turan dubbatama.

Seenaa Gumaa waliin walqabatee obboleessi Abbaa Joobir  waraanaan cimaa ture.   Abbaa Duula Abbaa Jilchaa kan jedhamu dha. Innis Abbaa Joobir kan gargaaraa tureefi gara Geeraafi Limmuutti darbuun Mootummaa ijaaruu yaaledha. Hojii gootummaa kana utuu hojjechaa jiruu Raas Gobanaan gara Limmutti akka fudhatame ni yaadatama. Gootummaa isaas

“… Abbaa Duula Abbaa Jilchaa

          Yaa shuuree Jabana kee

          Gara Ormaatti ajjeesuu

          Gara warraatti dheessuu.

          Amma innaa jabana koo

          Gara warraatti ajjesuu

          Gara Ormaatti dheessuu…” jedhanii isa faarsu.

Mootummaa Gumaay keessatti gootummaan baay’ee kan beekama yoo ta’u dur bosonni Gabbaa, Saayii Gaattiraafi Saxammaa deemuun Leencaafi Gafarsa ajjeesuun iddoo gotummaan itti mirkanaa’u ture. Kanaaf innaa geerarsaan yaadatan,

          Gurralee gurraa filaa

          Mirga sanyii koo silaa

          Maajiidha fide ilaa – jedhanii akka goota faarsaa turan beekama.

Kana malees mootoleen Wallaggaa Gibee keessatti ni faarfamu. Keessattuu gootummaan warra Beeraa akkasitti yaadatama.

          … Ammaa yaa Tuuchoo Beeraa

          Amma yaa Beeraa Ootaa

          Durattuu Leeqaa moota

          Barri bade attam (maal/ asii  goota … “jedhu.

Kana malees, xiiqii mootummaa Gumaa waliin walqabatee warri Gumaa akkasitti gootummaa ofii ibsatu. 

          “… Deega koo yaa farrisa

          Tur amman  sifannisa

          Hambabbeessa goobetti

          Ilma abbaan abaareetti

          Keelloo baala hin qabneetti

          Muka arbaa daraareetti

          Qeerroo yaada hinqabneetti ….

          Gamoojjiin korma tumee

          Beerat aseennaa dhaqee

          Baddaan garbuu babbaqee

          Beerat aseennaa dhaqee

          Namni Gumaa xuqee

          Handoodee korma dhugee

          Du’atti aseennaa dhaqee – jechuun cimina Oromoo Gumaay ibsu.

Mootummaan Gumaay erga Abbaan Joobir waraanarratti ajjeefamee bulchiinsa  Nafxanyootaa jalatti kufeen kaasee Illu Abbaa Booritti makamuun Raas Tasammaafi bulchitoota gara Finfinneetti Muudamaniin hoogganamaa ture.

Obbo Alamaayyoo Haayilee
Hayyuu Seenaa yoo ta’an wayita amma Gidduugala
Aadaa Oromootti qorataa seenaafi dursaa garee
seenaati.

Gaazexaa Bariisaa Hagayya 25/2011