Oromiyaatti Qonna Arfaasaa baranarraa callaa kuntaala miliyoona 22 oltu eegama

Finfinnee: Naannoo Oromiyaatti Qonna Arfaasaa baranaarraa callaa kuntaala miliyoona 22 ol argachuuf karoorfamee hojjetamaa jiraachuu Biiroon Qonna Oromiyaa ibse.

Hogganaa Ittaanaan biirichaa Obbo Bariisoo Fayyisaa ibsa torban kana addatti Dhaabbata Pireesii Itoophiyaaf kennaniin, Rooba Arfaasaa yeroo ammaa baay’inaan roobaa jirutti fayyadamuun naannichatti lafa heektaara miliyoona tokko ol sanyiin uwwisuun danda’amuu ibsu.

Naannichi Rooba Arfaasaa haala gaariin barana argate waggoottan ja’an darban keessatti argatee akka hinbeekne eeranii, biirichis qonnaan bulaan rooba argame kanatti fayyadamuun omishaafi omishtummaa akka dabaluuf xiyyeeffannaan hojjechaafi deggarsa barbaachisu taasisaa jiraachuus himaniiru. Karoora qabame kana milkeessufis leenjiin hubannoo cimsuu ogeessota sadarkaa sadarkaan jiraniifi qonnaan bultootaaf bal’inaan kennamuus ibsaniiru.

Akka Obbo Bariisoon jedhanitti, sagantaan Qonna Arfaasaa kun godinaalee 10 keessatti hojjetamaa jira. Karoora kana milkeessufis sochiin gama qooda fudhattootaatiin taasifamus daran fooyya’aa dhufeera. Dhiyeessii galtee qonnaa waliin walqabatees sanyii filatamaan kanneen akka qamadii, boloqqee, mishingaafi kanneen biroo kuntaalli miliyoona lamaa ol qonnaan bulaaf dhiyaateera.

Godinaalee tokko tokko keessatti dhiyeessiin xaa’oo harkifannaa qabaachuu kan eeran Hogganaa Ittaanaan kun, xaa’oo kuntaalli miliyoona 3.8 qonnaan bulaaf akka dhiyaateefi rakkoo dhiyeessii xaa’oo walqabatee jiru furuufis komaandi poostii hundessuun hordoffii cimaan taasifamaa jiraachuu dubbatu. Hojii hubannoo uumuu yeroo dheeraaf hojjetamaa tureen fedhiifi humni qonnaan bulaan xaa’ootti fayyadamuuf qabus daran dabalaa jiraachuu eeranii, bakka tokko tokkotti garmalee dabaluun roobaa rakkoo ta’aa jiraachuus ni kaasu.

Qonnaan bulaan kilaastaraan misoomsuu aadaa godhachuun omishaafi omishtummaan isaa akka dabalu taasisaa jiraachuu ibsanii, bara kana hojiin qonnaa bal’inaan kilaastaraan misoomaa jiraachuu dubbataniiru.

Taammiruu Raggaasaatiin

BARIISAA SANBATAA Ebla 28 Bara 2015