Hojiin ummata Tigiraay gara jireenyasaa idileetti deebisuu ittifufiinsaan raawwatamaa jira

Finfinnee: Gareen jila Pirezdaantii Ittaanaa Paartii Badhaadhinaa Obbo Adam Faaraahiin durfamuufi Pirezdaantota naannoleefi kantii­bota bulchiinsoota magaalaa Finfinneefi Dirre Dhawaa of keessatti hammatu, dheengadda Magaalaa Maqalee galuun haala umman­ni Tigiraay keessa jiruufi warshaalee saba­ba waraanaatiin barbadaa’an daawwateera. Bulchiinsi Mootummaa Yeroo Tigiraayis jila kanaaf simannaa ho’aa taasiseera.

Marii nageenyaa mootummaa federaalaafi naannoo Tigiraay gidduutti jalqabame ittifufi­siisuun, ummata Tigiraay sababa waraanaatiin miidhameefi buqqa’e gargaaruun, bu’uuraalee misoomaa barbadaa’an deebisanii suphuu­fi ijaaruun, obbolummaafi hariiroo umma­ta Tigiraayiifi naannolee caalaatti cimsuun kaayyoowwan gurguddaa daawwannichaati.

Garicha keessaa tokko kan ta’an Pirezidaan­tiin Bulchiinsa Mootummaa Naannoo Oromi­yaa Obbo Shimallis Abdiisaa akka jedhanitti, daawwannaa kanaan cabiinsaafi rakkoo gama hundaa ummanni Tigraay keessa jiru kan hu­ban ta’uufi mootummaan naannichaa hojii Tigraayiin deebisanii ijaaruu keessatti waan danda’u hundumaan deeggarsa ni taasisa. Mootummaan Naannoo Oromiyaa qonnaan bultoota Naannoo Tigraayiif dhiyeenyatti ti­raaktaroota 30 kan kennu ta’uufi mana bar­nootaa sadarkaasaa eeggate tokko bakka bar­baachisutti kan ijaaru ta’uu akkasumas, yeroo ittaanutti qarshii biiliyoona tokko ta’uun hojii misoomaa Naannoo Tigiraay keessatti hojjeta­mu deggaruun Bulchiinsa Yeroo Mootummaa Tigiraay cinaa kan dhaabbatu ta’uu ibsaniiru.

Pirezdaantiin Bulchiinsa Mootummaa Naan­noo Amaaraa Doktar Yiliqaal Kaffaalaa akka jedhanitti, nageenyaafi waliigalteen nu bar­baachisa, rakkoolee karaa ammayyaawaan hiikuuf qophii ta’uufi Bulchiinsi yeroo Tigi­raayiifi abbootiin amantii Naannoo Amaaraa, Magaalaa Baahiir Daar dhufanii akka mari’ataniifis waamicha dhiheessaniiru. Gara fuulduraattis bakka buutota ummata Amaaraa qabachuun gara naannolee Tigiraayiifi Affaar kan deeman ta’uus dubbataniiru.

Kantiibaan Magaalaa Finfinnee Aadde Adaanach Abeebee akka jedhanitti, bulchiinsi Magaalaa Finfinnee ummata Tigiraayiif deg­gersa yeroofi dhaabbiidhaan barbaachisu adda baasuun irratti hojjechaa jira. Daa’imman gara barnootaatti akka deebi’aniifi yaalii bar­baachisu akka argataniif deggersa meeshaalee barnootaafi wal’aansa fayyaa taasisuuf walit­tiqabaa jira. Mana barnootaa tokkoofi buufa­ta fayyaa tokkos ijaaruuf qophiin taasifamaa jira. Bulchiinsi magaalaa Finfinnee galii moo­tummaafi ummata magaalattii bu’uura godha­chuudhaan marsaa duraatiin qarshii miliy­oona 500 taasisuuf hojjechaa kan jiru ta’uu himaniiru.

Pirezdaantonni naannolee hundiifi Bulchiiin­si Magaalaa Dirree Dhawaas ummata isaanii waliin ta’uun ummata Tigiraayiin deggeruufi deebisanii ijaaruuf deggersa qarshiifi akaakuu adda addaa miliyoonaan lakkaa’amu kan taas­isan ta’uufi gara fuulduraattis hanga ummanni Tigiraay jireenyasaa idileetti deebi’utti deg­gersa barbaachisu taasisuuf waadaa galaniiru.

Oduu biraadhaan jilli Abbootii Gadaa, Haad­holii Siinqee, Abbootii Amantii Oromoon durfamu Wiixata darbe deggarsa midhaan nyaataa ummata Oromoorraa walitti qa­bameefi qarshii miiliyoona 45’tti tilmaamamu qabatee Magaalaa Maqalee dhaquun walit­ti bu’insa tureen rakkoo ummanni Tigiraay keessa jirus daawwateera.

Jila kana waliin gara Maqaleetti kan imalan Hogganaan Biiroo Aadaafi Turizimii Oromi­yaa Obbo Huseen Fayyisoo akka jedhanitti, ummanni Oromoo duudhaa walgargaarsaa qabuun ummata obbolaa Tigraayiif deggarsa midhaan gosa adda addaa qarshii miliyoona 45tti tilmaamamu taasiseera.

Abbootiin Gadaafi Abbootiin Amantii Oro­moo gamasaaniitiin akka jedhanitti, umman­ni Oromoo ummata aadaa hammataa qabuufi yeroo rakkoon waraanaa tures dhalattoota Tigraay naannoo Oromiyaa keessa jiraatan ofitti qabee jiraachisuusaa himanii, ummanni Oromoo hanga ummanni Tigiraay jireenya isaa idileetti deebi’utti deggarsa barbaachisu kan taasisuuf ta’uuf marii nageenyaa kana milkeessuuf kan hojjetu ta’uu himaniiru. Oromoon obbolummaa sabaafi sablammoot­aa cimsuu har’a eegale osoo hintaane, jiruuf jireenya isaa taasifatee dagaagsaa har’a kan ga’e ta’uus eeraniiru.

Hoggansi Bulchiinsi Yeroo Mootummaa Tigi­raayis garee jila kanaaf simannaa ho’aa taas­isuufiin deggarsa ummanni Oromoo ummata naannichaaf taasises galateeffateera.

Jiraataan magaalaa Maqalee Obbo Birhaan Gabragoorgis Yaada Dhaabbata Pireesii Itoophiyaaf kennaniin akka jedhanitti, gar­gaarsi ummatni Oromoo ummata Tigiraay­iif taasisaa jiru daran isaan gammachiiseera. Gargaarsichis Ummattoota lameen gidduu diinummaan akka hin jirre kan agarsiisuudha.

Ummatin Oromoo miira obbolummaa dhugaa Ummata Tigiraayiif qabu qabatamaatti agar­siisaa tureera, ammas agarsiisaa jira jedhanii, hariiroo qabbanna’ee tureefi wanti ta’aa jiru guyyaadhaa gara guyyaattii fooyya’aa akka ji­ruufi haalli nageenyaas qabatamaan fooyya’aa jiraachuu ibsaniiru.

Kutaa Qophiitiin

BARIISAA SANBATAA Ebla 21 Bara 2015