Humni qilleensa dirqama kamuu ga’umsaan raawwatu ijaaramuun ibsame

Finfinnee: Rifoormii taasifameen Itoophiyaan humna qilleensaa dirqama fedhe ga’uu raawwa­chuu danda’an horachuu ajajdoonni waraanaa olaanoon biyyattii ibsan.

Sagantaa eebba dokimantarii tibbana mata duree “Samichi keenya” jedhuun gaggeeffamerratti Shuumiin Itaamaajoorii Raayyaa Ittisa Biyyaa Fiildmaarshaal Biraanuu Juulaa akka jedhanitti, humni qilleensa Itoophiyaa weeraraafi aggaam­mii yeroo garagaraa irra deddeebiin biyyarratti yaalame ga’umsaan qolachuu danda’eera. Daan­diin humna qilleensaa rifoormii taasiseen gooto­ta haalaafi yeroo kamuu balaa ga’umsaan qola­tan baay’inaafi qulqullinaan horateera. Maqaa gaarii dur qabus caalmaatti cululuqseera.

Humni qilleensa Itoophiyaa dhaabbata ibiddaan qoramee injifannoon galmeesse ta’uun ibsanii, biyya kan boonsuufi dhaabbilee biroof fakkeen­ya gaarii ta’uusaa himaniiru.

Humna qilleensaa sadarkaa biyyattii gituufi dhaloota boonsu ijaaruun biyya faajjii birma­dummaafi walqixxummaa taate Itoophiyaa ummatni nagaan ba’ee galuufi olaantummaan seeraa hundeen lafa qabate taasisuun hojiin ri­foormii kun xiyyeeffannoon hojjetamaa akka jirus ibsaniiru.

Akka Fiildmaarshaal Biraanuun jedhanitti, humni qilleensa ijaaramaa jiru hidhannoon barbaachisu yoo miidhame suphuufi haaressuu hojmaatnisaa gara dijitaalaatti jijjiirameera. Dandeettiin dirqama raawwachuusaas haala ad­dunyaa waliin dabalaa jira.

Haaluma walfakkaatuun Ajajaa Olaanaan Hum­na Qilleensa Itoophiyaa Letenaal Jeneraan Yil­maa Mardaasaa gamasaaniin, humni qilleensa kun yeroo garagaraa dirqama garagaraarratti bu’aa olaanaa galmeessuu himanii, rifoormii ta­asifameen dhaabbaticha keessatti jijjiiramni guddaan akka mul’ate ibsaniiru.

Akkasaan jedhanitti, waggoottan darban humna namaa ga’oomsuu, hidhannoo ammayyoomsuu, bu’uuraalee humna qilleensaa ijaaruufi naannoo dhaabbatichaa hawwata gochuurratti bal’inaan hojjetamaa ture. Fiilmiin milkaa’inaafi hojii­wwan humni qilleensa hojjete ibsus qophaa’ee agarsiisaaf dhiyaateera. Hojiiwwan rifoormii ka­naan bu’awwan qabatamoon dhalootaa dhaloot­atti darban hojjetaman olkaa’amaa adeemu.

Waaqshuum Fiqaaduutiin

BARIISAA SANBATAA Ebla 21 Bara 2015