“Tarkaanfii nageenya waaraa buusuuf Itoophiyaan fudhachaa jirtu Antooniyoo Biliinkaniin jajameera” –Ambaasaaddar Mallas Alam

Finfinnee: Hariiroon dippilomaasii Ameerikaafi Itoophiyaa kan yeroo dheeraa ta’us walwaraansa Itoophiyaa kaabaatti mudateen walqabatee yeroof sakaalamee turuun nibeekama.

Haata’uutii ammaan tana nageenya waaraa biyyattii keessatti buusuuf tarkaanfii mootummaan Itoophiyaa gama maraan fudhachaa jiru mootummaa Ameerikaatiin kan jajjabeeffamu ta’uu waliigalamuu Dubbii Himaan Ministeera Dhimma Itoophiyaa Ambaasaaddar Mallas Alam dubbataniiru.

Dubbii himichi turtii Ministeerri Dhimma Alaa Ameerikaa Antoonii Biliinkan Itoophiyaatti dabarsan ilaalchisuun ibsa dheengadda miidiyaaf kennaniin hariiroon Itiyoo-Ameerikaa cimee akka ittifufu waliigalamuu kaasaniiru. Tarkaanfii Itoophiyaan nageenya waaraa buusuuf fudhataa jirtus Antoonii Biliinkaniin jajameera.

Jalqabbichi Itoophiyaan rakkoo nageenyaashii ofiin furachuun dippilomaasii biyyoota biroo waliin qabdu daran akka cimsattu kan taasisu waan ta’eef mootummaan Ameerikaas deeggarsa barbaachisu taasisuuf waliigalamuu ibsaniiru.

Itoophiyaan rakkoo nageenyaa kan mataashii hiikuurra dabartee akka gaanfa Afrikaatti rakkoo mudataa jiru furuuf hojiin hojjetaa jirtu jajjabeessaa ta’uus Antooniyoo Bilinkaniin jajamuullee kaasaniiru.

Keessumaa rakkoo Sudaan, Sudaan Kibbaafi kan Somaaliyaa hiikuuf tarkaanfiin gama Itoophiyaatiin fudhatamaa jiruufi bu’aan galmaahaa jiru biyyattiif beekamtii guddaa kan kennu ta’uu Biliinkan dubbachuu Ambaasaaddar Alam ibsaniiru.

Tarkaanfii Itoophiyaan gama maraan keessumaa nageenya waaraa buusuuf fudhataa jirtu guddina biyyattiif bu’aa buusuurra darbee hariiroo dippiloomaasii biyyattiin biyyoota biroo waliin qabdu daran kan cimsu akka ta’e Biliinken dubbachuufi fuulduarrtis Ameerikaafi Itoophiyaan waliin kan hojjetan ta’uu waliigalamuus eeraniiru.

Ministirri Dhimma Alaa Ameerikaa Antoonii Biliinken turtiisaanii Itoophiyaa nagaan raawwachuun gara Niijaritti imalaniiru.

Waasihun Takileetiin

BARIISAA SANBATAA Bitootessa 9 Bara 2015