Bineensonni uumamaan rabbi yoo isaan uumu waan ittiin diina isaanii ofirraa faccisan, kaaniif gaafa ittiin waraanan, kaaniif dandeettii fiigicha saffisaa ittiin baqatanii ba’an, kanneen biroof ammo humna ittiin diina isaanii caccabsan kennee uume. Akkasuma bineensota tokko tokkoof ammoo summii diina isaaniitti naqanii ittiin galaafatan kennee uume.
Dhala namaaf ammoo gaanfa ittiin waraananis ta’e summii, humna cimaas kennuufi baatus rabbi sammuu ittiin bineensota biroo irra aanan kennee jiraachisa. Har’aaf kan fayyaa waliin baay’ee walqabatan bineensota summii isaaniitiin dhala namaa dabalatee bineensota biroo galaafatan, yoo kan galaafachuu baatan ammoo hedduu dhukkubsachiisan keessaa kan biyya keenyatti baay’inaan argaman bofaafi ciniinnaa ilbiisotaa haa ilaallu.
- Ciniinnaa Bofaa
Bofti akkuma namni hundi beeku summii ishiidhaan nama galaafachuudhaan beekamti. Haa ta’u malee bofti gosti marti summii qaba jechuu miti. Gosootni bofaa hedduun isaanii summii hinqaban. Kanneen qaban ammoo jabinni ykn summii isaanii gosaa gosatti garaagarummaa cimaa qaba. Gosti bofaa addunyaa kanarraa dhala namaa hedduu ajjeesuudhaan beekamu gosa Koobraa “cobra” jedhamu yoo ta’u baay’inaan kan argamu naannoo gammoojjiittidha.
Gosti bofaa koobraa kun lubbuu namaa baay’inaan kan dabarsu summiin isaa gosa bofaa kan biraa (warren summii qaban) waan caaluuf osoo hintaane amala nama loluu waan qabuuf. Keessumaa biyya hindii (India) keessatti wagga waggaatti lubbuu namoota hedduu galaafata. Walumaa galatti waggaatti sababa bofaa qofaan namoonni kuma sadeettamaa ol ta’an lubbuu isaanii dhabu.
Mallattoo
Mallattoon erga bofti nama ciniintee booda namarratti mul’atu namaa namatti garaagarummaa guddaa qabaachuu malus walumaa galatti garuu namni tokko yoo bofaan ciniiname mallattoolee armaan gadii kana argisiisuu mala:
- Bakka bofti ciniine sanatti madaan xiqqoon (puncture wound) argamuu,
- Bakki ciniiname sun diimachuu, dhiita’uu, qunca’uu ykn luqqa’uu, dhiiguu,
- Dhukkubbii cimaan akkasumattis yoo harkaan qabanis bakka sanatti namatti dhaga’amuu,
- Olguurraa ykn haqqeefi teessisaa,
- Hafuura baafachuu dadhabuu ykn hafuurri nama cituu,
- Onneen ofii garmalee akka nama fiigaa jiruutti dha’achuu,
- Ijji ofii seeraan laaluu dadhabuu ykn namatti dukkanaa’uu,
- Afaan ofii keessatti dhandhamni ykn miirri akka shaaraa ykn sibiilaa namatti dhaga’amuu,
- Garmalee gororuu ykn garmalee dafqi qaamarra dhangala’uu,
- Qaamni ofii adooduu ykn miirri itti dhaga’amuu dhiisuu.
Haga mana yaalaa geenyutti nama bofti ciniineef gargaarsa duraa maal gochuu qabnaa?
Nama bofti ciniinte tokko jalqaba sammuu keenyatti kan dhufu qabu mana yaalaa akka geessuu qabnu yaaduudha. Gara mana yaalaa yoo deemu namni bofni ciniinte kun mallattoo irratti hundaa’uudhaan yoo kan gosti bofaa beekamtu ta’e ammoo gosa bofaa irratti hundaa’uudhaan (kan summii qabuufi hinqabne) qorichi antivenom (farra summii) jedhamu ni kennamaaf.
Namni yoo mana yaalaa deemu ofiin of gargaaree deemuun hinfilatamu. Namni biraa gargaaree yoo kan konkolaataan jiru ta’e konkolaataan yokaan waan biraan gara mana yaalaa geessisuu qaba. Haa ta’u hanga mana yaalaa geessisnutti ammoo akkasumaan geessuu irra wantoonni nuti gochuu qabnuufi gochuu hinqabne maal maal fa’i kan jedhu haa ilaallu.
- Yoo bofti ciniinte sun bakka san jirti ta’e yookaan ajjeefamteetti ta’e, suuraa ishee qabaachuun (kaafachuun) gosti bofa sanaa kam akka ta’e adda baasuudhaan yaalamuuf hedduu gargaara.
- Namni bofti ciniine tasgabbaa’uu qaba. Kunis yoo kan baay’ee dhiphate ta’e dhiigni daddafee waan onnee isaa/ishii keessa deddeebi’uuf, summii bofaa sana bakka jalqabaatii fuudhee qaama keessa waliin ga’a waan ta’eefidha.
- Namni ciniiname sun haala (position) isa/ishee boqochiisuun ciisuun barbaachisaadha.
- Waan akka sibiilaafi meeshaalee miidhaginaa akka qubeelaa harkaa, ambaarii harkaa ykn Faaya morma irraafi kkf qaama nama ciniinamee irraa baafamuu qabu.
- Bakki bofti ciniinte sun sirriitti saamunaafi bishaaniin battalumatti miiccamuu qaba.
- Bakka ciniiname sana haga dandeenye mallattoo itti gochuudha. Yoo danda’ame ammoo sa’aa itti ciniiname ykn ciniinamtes irratti katabuudha.
Waantoonni nuti gochuu hin qabnehoo maal fa’ii?
- Bofa ciniine sana qabuudhaaf yaaluun tasumaa sirrii miti. Yoo kan du’e ta’e illee gara mataa isaa baachuu ykn tuttuqquu yaaluun tasumaa balaa namatti fida.
- Bakka tokko tokkotti akka jedhamu bakka ciniiname sana gad hambisanii qaama ciniiname sana hidhuun faayidaas hinqabu, miidhaa biraafis nama saaxila. Kanaaf bakka ciniiname hidhuun dhorkaadha.
- Bakka ciniiname ykn qaama ciniiname sana summiin akka ba’utti jedhanii waan qara qabuun kukkutuu ykn mummuranii dhiigsuun tasumaa summii seene sana hinbaasu waan ta’eef kana gochuu irraa of qusachuudha.
- Summii keessaa baasuuf jecha bakka ciniiname sana ciniinuu, xuuxuufi kkf irraa of eeggachuudha.
- Bakka ciniiname sana irra bishaan qorraa kaa’uu ykn qaama ciniiname sana bishaan keessa kaa’uunis waan nama ciniiname sana hingargaarreedha.
- Qorichoota dhukkubbii dhorkan akka aspirin, ibuprofen fikkf haga mana yaalaa ga’amutti ofii ofiin fudhachuu irraa of qusachuudha.
- Hedduu (Ciniinnaa) Kaannisaa fi Soonsaa
Biyya keenya keessatti ilbiisonni nama ciniinanii nama dhukkubsachiisan ykn qaama namaa dhiitessan hedduu ta’anis kanneen hangafaa kanniisaafi soonsa akka ta’e beekamaadha. Namoota hedduu ciniinnaan kanniisaafi soonsaa qaama dhiitessee bakka ciniiname san gogaa diimessee akkanumaan dhiisa. Kanneen biroo amma qaama guutuu dhiitessee yoo hatattamaan yaalaa hinarganne lubbuu dabarsuutti ga’a. Keessumaa ilbiisonni kun qoonqoo keessa yoo nama ciniinan qoonqoon keessi isaa dhita’ee cufadhuun hafuura baafachuu dhorkee carraan lubbuu dabarsuu isaa hedduu olka’aadha. Walumaa galatti nama kanniisni, soonsi ykn ammoo ilbiisni biraa ciniinte tokkoof gargaarsa kanaa gadii gochuu dandeenya.
- Ilkee ykn kan yoo kanniisniifi soonsi nama ciniintu namarratti citee hafu sana hatattamaan waan ATM ykn furtuu fayyadamnee ofirraa kaasuudha.
- Bakka ciniiname sanarratti yoo waan qorraa akka cabbii argannee irra keenye dhiitaafi dhukkubbii dhufuu malu hedduu hir’isa.
Ciniinnaan ilbiisotaa hedduu kana irra darbee yaala dabalataa cimaa kan hinbarbaanne yoo ta’u, namoonni tokko tokkommoo akkuma olitti kaafne addatti hubamuu malu. Walumaa galatti namni ilbiisota kanaan ciniinamee mallattoo akka hafuurri cituu ykn hafuura baafachuu dadhabuu, arrabni ykn qoonqoon dhiita’uu, oldeebisuu ykn haqqeefi teessisaa, dhaabbatanii (of danda’anii deemuu dadhabuu) ykn of wallaaluu argisiisan hatattamaan mana yaalaa deemanii qoricha dhibee kanaaf ta’u akka waraannatan gorfama. Kana ta’uu baannaan haala salpaadhaan lubbuun darbuu mala.
- Ilbiisota summii addatti qaban kanneen biroo
Ilbiisonni hedduun kanneen nuti guyyaa guyyaatti argaa oollufi tarii ammoo yeroo ijoollummaa keenyaa Harkaan qabneellee ittiin taphataa oollu summii nama galaafatu qabu. Keessumaa Gosoonni sharariitii tokko tokko summii hamaa waan qabaniif, gosoota sharariitii sana adda baafnee haga hinbeeknetti walumaa galatti tuttuqquu dhiisuufi irraa fagaachuu qabna. Akkasumas gosoonnii fatteefi raammoo tokko tokkollee summii qabu.
Ilbiisni Qajjibbuu (scorpion) jedhamtu ammoo kan lafa Gammoojjii keessatti baay’inaan argamtuufi eegee ishiin kan nama ciniintu, ilbiisota biroo caalaatti dhukkubbii baay’ee hamaafi yeroo dheeraa namarra turuun kan nama hubdu, darbee darbee ammoo namoota tokko tokkorratti haga lubbuu dabarsuutti kan deemtuudha.
Keessumaa biyya keenya keessatti manneen yaalaa nuti qabnu keessatti qorichoonni antivenom jedhaman ciniinnaa bofaa yaaluuf oolanis ta’e kanneen akka epinephrine waan akka ciniinnaa ilbiisotaa sadarkaa hamaa irra ga’eef oolan baay’inaan waan hin argamneef ofeeggachuutu waan hundaa caala. Keessumaa daa’imman osoo hinbeekiin ilbiisota kanatti akka hinbuune gorsuun ga’ee keenya.
Dr. Naafyaad Geetuu
Fayyaa hindhabinaa
Doktar Naafyaad Geetuu
BARIISAA SANBATAA Caamsaa 27 Bara 2014
