“Ayyaanni dubartootaa baranaa adda” -Dubartota miseensota Caffee

Adaamaa: Seenaa Itoophiyaa keessatti barana yeroo jalqabaatiif Pirazdaantiin dubartii biyya bulchuuf carraa argatte, Manni Murtii Waliigalaas Pirezidaantummaa dubartii jalatti kufe, Raayyaan Ittisa Biyyaas yeroo jalqabaatiif dubartiin hoogganamuuf dirqame.

Baay’inni dubartii dur sadarkaa hooggansaa keessattuu ministerummaatti akka mi’eessituutti takkaafi lama mul’achaa ture barana aduun dubartii baatee walakkaa kaabinee biyyattii fudhatte.

Kun immoo akka Afrikaattis ta’ee addunyaatti biyya dubartii baay’inaan hooggansa olaanaa irratti hirmaachisan keessaa sadarkoota duraa irratti biyyattii waamsisee, dubartii immoo hiree olkaasee gammachiise.
Ayyaanni dubartootaa dur dubbii qofaan kabajamaa tures barana dhugumatti ayyaana dubartootaa ta’ee kabajama.

Yeroon ammaa kana dubartootni afaan qofaan osoo hintaane qabatamaan dhiiraan qixa gara aangoowwan olaanootti dhufan waan ta’eef kabaja ayyaana dubartootaa baranaa kan adda isa taasisu ta’uu dubartootni miseensota Caffee ni dubbatu.

Aadde Murshidaa Abbagissaa Godina Buddoo Baddalleetti bakka buutuun aanaa Dhidheessaa yemmuu ta’an, ganda keessa jiraatanitti immoo dura teessuu waldaa qusannoo dubartootaati. Ayyaana dubartootaa baranaa dubartoota miseensa waldichaa ta’an hunda kakaasuudhaan akkasumas sadarkaa aanaatti hiriiraan kabajuuf qophii xumuruusaanii dubbatu.

Tanaan dura ayyaanni dubartootaa maqaa qofaan waggaa eeggatee yeroo tokko kabajamuun alatti qabatamaan wanti dubartiirratti hojjatame laafaa ta’uu kan eeran Aadde Murshidaan, inni baranaa garuu dubartiin sadarkaa pirezidaantii biyyaa irraa kaasee ministerummaatti kan itti filamte ta’uun kan adda isa taasisuufi hamilee dubartootaas kan cimsu ta’uu ibsu.

Godina Harargee Bahaatti bakka buutuun Aanaa Baddannoo Aadde Hamziyaa Sheekaa gamasaaniitiin, hanga ammaatti ayyaanni dubartootaa osoo walirraa hincitne waggaa waggaadhaan kabajamuunsaa injifannoo har’a dubartootni gonfachaa jiraniif shoora olaanaa taphachuu dubbatu.

Ammaan tana hirmaannaan dubartootni aangoo sadarkaa federaalaatti qaban dabaluun gaarii ta’ee osoo jiru kun immoo sadarkaa godinaafi aanaaleetti garuu gadi bu’uu kan hindandeenye jedhu.

Naannawawwan baadiyyaatti dubartootni ammas xiyyeeffannoo gahaa argachuu dhabuun iddoowwan tokko tokkotti immoo ilaalchi boodatti hafaan dubartootaan walqabatee jiru sun haala hafuu dandeessisurratti hojii bal’aan hojjatamuu qaba. Xiyyeeffannoon kabaja ayyaanichaas kanumarratti ta’uu akka qabu dhaamu.

Bayyanaa Ibraahimiin

.