Atileet Tigisti Asaffaa maaraatoonii Londoon 45ffaa dubartoota gidduutti Dilbata darbe geggeeffame jalqabaa hanga xumuraatti morkii cimaa taasisuudhaan dhumarratti ga’umsa cimaa agarsiisuudhaan dorgommicha sa’aatii 2:15.50n xumuruudhaan tokkoffaa baateetti. Qabxii Atileet Tigisti dorgommicharratti galmeessifte riikoordii haaraa ‘Women’s-only World Record’ ta’ee galmaa’eera.
Atileet Tigisti maaraatoonii dubartoota kana irratti bakka fiigsiftoonni (pacemaker) dhiiraa hinjirretti fiigsiftoota dubaraa qofaadhaan fiigdee riikardii cabsuudhaan riikardii haaraa ‘Women’s-only World Record’ galmeessifteetti.
Atileetiin Keeniyaa Ruut Cheepteegeey maaraatoonii dubartootaa sa’aatii 2:09.56n xumuruun riikoordii addunyaa qabattee kan jirtu yoo ta’u, Atileet ruut riikoordii maaraatoonii dubartootaa Atileet Tigistiin qabamee ture sa’aatii 2:11.53 ALA Mudde 24 bara 2023 fooyyessuudhaan riikoordii maaraatoonii dubartootaa addunyaa harka galfatte. Atileet Ruutis ta’e Atileet Tigisti riikoordii maaraatoonii addunyaa kan cabsan fiigsiftoonni (pacemaker) dhiiraa fayyadamuudhaani.
Atileet Tigisti maaraatoonii Londan 45ffaa torban darbe adeemsifamerratti fiigsiftoonni (pacemaker) dhiiraa utuu hinfayyadamin fiigsiftoota dubartootaa gargaaramuun dorgommicha sa’aatii 2:15.50n xumuruudhaan riikardii haaraa ‘Women’s-only World Record’ jedhu galmeessisuun beekamtii argatteetti. Dorgommichi fiigsiftoota dubartootaan deggeramee waan adeemsifameef qabxii atileet Tigisti galmeessifte ‘Women’s-only World Record’ jedhamee galmaa’eera.
Atileet Tigisti fageenyichaan riikoordii kanaan dura Atileetii Keeniyaa Peerees Jeepchiiriinaa jedhamtuun qabamee ture sa’aatii 2:16.16 fooyyessuudhaan riikoordii haaraa galmeessifteetti.
Natsaannat Taaddasaatiin
BARIISAA SANBATAA Ebla 25 Bara 2017
