Finfinnee: Namootni miliyoona 1.5 ayyaana Fiichee Cambalaalaa irratti akka hirmaatan Biiroon Aadaa Turizimiifi Ispoortii Naannoo Sidaamaa beksiise. Akka duudhaa ayyaanichaatti guyyoota 15f ayyaaneffatamaa akka ittifufu ibsaniiru.
Hogganaa ittaanaan birichaa Obbo Abbabaa Maarimoo ibsa kaleessa gaazexaa Bariisaaf kennaniin; ayyaana Fiichee Cambalaalaa baranaarratti dhalattootni naannichaafi naannichaan alaa waliigalaan namootni miliyoona tokko tuqaa shanii hirnaaaniiru.
Akka iba isaaniitti, ummatni Sidaamaa durirraa eegalee falaasama, amantaa, seenaa, aadaa, qaroominaafi duudhaa mataasaa qaba. Ayyaanni Fiichee Cambalaalaa dhaha yeroo Ji’aafi urjiileerratti hundaa’uudhaan bara haaraatti ce’uuf ayyaaneffatame.
Duudhaa qubsiisa lafa bu’uura godhachuudhaan qabiyyee lafaa dhuunfaafi waloo jedhamee adda ba’ee jiraachuu himanii; bakki ayyaanni Fiichee cambalaalaa ittikabajamu Gudumaalee jedhama jedhaniiru. Ayyaaneffannaa kana irrattis sirbootaafi nyaata aadaa Sidaamaa sibuufi nyaachuudhaan kabajame. Ayyaanichaaf ji’i lama yeroo hafutti hawwan nyaata aadaa Sidaamaa kanneen akka qoccoo, dhadhaa kanneen biroo qopheesuudhaan sadarkaa maatiittis kabajama.
Ayyaanichi guyyoota 15ffa akka ayyaaneffatamuu himanii; guyyoota hunda caalaa bakka hundatti ayyaanichi kan mul’atu ayyaaneffannaa Bitootessa 18fi 19ti jedhaniiru. Akka duudhaa ayyaanichtaati ayyaanni Bitootessa 18 ayyaaneffatamu Burshaamee nyaachaa hulluuqaa hojjetanii hunduu mana isaatti kan ayyaaneffamuudha. Guyyaa ittaanu (borumtaasaa) Gudumaalee, magaalaa Hawaasaatti Cambalaalaan akka kabajamu ibsaniiru.
Ayyaana kana irrattis angawoota federaalaa, naannoleefi jila aadaa ollaa Sidaamaa, bulchiinsa magaalota lameenirraa argamuudhaan ayyaanefftameera. Namootni ayyaana kanarratti hirmaatan akka aadaa isaaniitti uffchuudhaan kennaa akka aadaa isaaniitti kan kenna jiru. Akka aadaa Sidaamaatti kennaa kennamu fudhatanii galuudhaan walitti dhufeenyaafi tokkummaa saba, sablamootaafi ummattootaa cimsuu keessatti ayyaanichi gumaacha olaanaa qaba jedhaniiru.
Meeshaalee aadaa uffannaa Sidaamaa, tajaajila geejibaafi hoteelaa magaalichatti gaggeeffamuun gumaachi ayyaanichi diinagdee keessatti qabu olaanaadha.
Ayyaanni Fiichee Cambalaalaa Mooummota Gamtoomanitti Dhabbata Barnootaa, Saayinsiifi Aadaa (UNESCO) beekamtii argatee waan jiraachuu himanii; Biiroon Aadaa Turizimiifi Ispoortii Naannichaa duudhaasaa eeggatee akka kabajamuuf qophii barbaachisaa taasiseera. Koreen garagraaraa ijaaramuudhaan duudhaalee ayyaanichaa waloomina cimsan akka mul’ataniif miidiyaalee maxxansxaafi elekitroonikisii garagaraa fayyadamuudhaan akka dhalootatti dabuuf hojiin beeksiisuu, hubachiisuu bal’aan hojjetameera jedhaniiru.
Gammachuu Kadiriin
BARIISAA SANBATAA Bitootessa 20 Bara 2017
