Finfinnee: Rakkoo qulqullina barootaaf sababa kan ta’e hanqinni mana jireenyaa isa tokko yoo ta’u; hudhaa kana furuuf godinni Harargee Lixaa cichee hojjetaa jiraachuu bulchaa Ittaanaan Bulchaa Godina Harargee Lixaa beeksisan.
Bulchaa Ittaanaan godinichaa Obbo Tashoomaa Kabbadaa ibsa addatti kaleessa Gaazexaa Bariisaaf kennaniin rakkoo mana jireenyaa barsiisotaa furaa jiraachuu beeksisaniiru.
Akka ibsasaaniitti Harargee Lixaatti barana qofa barsiisota 1000 oliif manni jireenyaa kan kenname yoo ta’u; 204 oliif ammoo lafa ijaarsa manaa kennaniiru.
Dhimmoota qulqullina barnootaaf sababa ta’an keessaa rakkoon mana jireenyaa barsiisotaa furuu dhabuu isa tokko yoo ta’u; barana qofa hojii kutannaa siyaasaan guutamee hojjetameen manneen jireenyaa 1000 ol ijaaramanii barsiisotaaf kennamaniiru.
Kanneen 204 ol ta’aniifimmoo lafti ijaarsa manaaf oolu kan kenname yoo ta’u; warreen hafaniifis dhawaata dhawaataan mijeessuun barnoota qulqullina qabu waliin gahuuf kan hojjetan ta’uu ibsaniiru.
Kenniinsi tajaajila mana jireenyaafi lafa ijaarsa manaa waggaa tokko keessatti bifa kanaan raawwachuunsaa daran kan nama onnachiisudha jedhanii; bara ittaanuttis kanaa ol hojjechuun abbaa qalamaa kan ta’an barsiisota keenya fayyadamaa taasisuuf kutannnaan kan hojjetan ta’uu eeraniiru.
Hudhaa dabalataa qulqullinni barnootaaf sababa kan ta’e BID(Barnoota Idileen Duraa)f xiyyeeffannoo kennuu dhabuudha jedhanii; kallattii mootummaan kaa’e hordofuun manneen barnootaa 1000 ol ijaaramuu dubbataniiru.
Hawaasni godinichaas dheebuu barnootaaf qabu agarsiisuuf humnaafi qabeenyasaaf osoo hin waakkatiin ijaaramuu manneen barnootaa BID kanaa keessatti gahee leencaa taphataniiru jedhu.
Dhaloota barnoota ammayyaan ijaarame horachuuf tattaaffiin gama mootummaan taasifamaa jiru daran kan nama jajjabeessudha kan jedhan Obbo Tashoomaan; hawaasnis kanumarraa ka’ee hirmaanna mataasaan ijaarsa manneen barnootaa BID kuma tokkoo ol waggaa keessatti akka raawwate kaasaniiru.
Dhaloonni keenya barnoota ammayyaan ijaaramuunsaa egeree biyyaatti abdii kan horu ta’uu ibsan; godinnisaanii misooma barnootaarratti kanaa ol hojjechuuf kan tattaafatu akka ta’e eeraniiru.
Dhimmi barnoota qulqullina qabu waliin gahuu dhimma biyya ijaaruu ta’uu kaasanii warraaqsa misooma barnootaa gaggeeffamaa jiru keessatti lammiileen biyya keessaafi alaa ashaaraasaanii keewwachuu akka malan dhaamaniiru.
BARIISAA SANBATAA Bitootessa 20 Bara 2017
