Finfinnee: Ji’oota sadan darbanitti xumura ijaarsa hidhaa haaromsaaf qarshii miliyoona 271 ol sassaabamuu Waajjirri Qindeessaa Ijaarsa Hidhaa Haaromsaa beeksise.
Raawwachiisaan Hojii Paablik Dippiloomaasiifi Qunnamtii Ummataa Waajjirichaa Obbo Solomoon Daani’eel Kibxata darbe Gaazeexaa Bariisaaf akka ibsanitti, ummatni keessaafi alaa ijaarsa hidhaa haaromsaa gara xumuraatti fiduuf tumsa maallaqaa, beekumsaa, humnaafi dippiloomaasii olaanaa taasisaa jira. Kurmaana tokkoffaatti qofa maallaqa callaa qarshii miliyoona 271 ol walitti qabuun danda’ameera.
Tumsi hawaasni dayaasporaa taasisu yeroodhaa gara yerootti dabalaa jiraatus biyyoota tokko tokkotti bittaan boondii dhorkaa ta’uufi foormaatiin onlaayinii diriiree maallaqni sassaabamaa jiru gargar ta’uun tarii hanga tokko dhiibbaa uumuu eeranii; rakkoolee mudatan kanneen furuuf embaasiiwwaniifi qonsiloota garagaraa waliin marii bal’aa taasifamerraa duubdeebii gaariin argamuu ibsaniiru.
Gama biraatiin ammaan tana karaa ergaa gabaabaa 8100A’n, waancaa hidhaa haaromsaafi waancaa nageenyaa qarshiin hawaasarraa walitti qabamaa jiraachuu himanii; ammaan tana Waancaan hidhaa haaromsaa naannoo Sumaaleefi Waancaa nageenyaarraa Finfinnee jiranirraa waliigalaan qarshiin miliyoona 100 ol walittiqabuuf karoorfachuus himaniiru.
Ijaarsi hidhichaa yeroo ammaa %96.7 ga’uu eeranii; kanaan dura xumura ijaarsa hidhichaatiif qarshiin biliyoonni 50 akka barbaachisu gabaafamaa turus daballii doolaaraatiin walqabatee tarii ammaan tana qarshii biliyoona 80 ol gaafachuu mala jedhaniiru.
Bu’uuruma kanaan yeroo ammaa Baankii Daldala Itoophiyaa waliin www.mydam.com, akkasumas applikeeshiniin mobaayilii ethiodirect’ jedhamuufi baankii Zamanii waliinta’uun www.mygerd.com jedhamuun qarshiin hawaasarraa walitti qabamaa jira.
Ijaarsa hidhichaa saffisaan xumuranii faayidaa dinagdeesaa karaa guutuun milkeessuuf tumsi ummataa cimee akka ittifufus Obbo Solomoon dhaamaniiru.
Waaqshuum Fiqaaduutiin
BARIISAA SANBATAA Sadaasa 14 Bara 2017
