Finfinnee: Duulli sosochii galmeessa Waraqaa Eenyummaa Biyyaalessaa walta’iinsa (Faayidaa) Waajjira Ministira Muummeetti Waajjira Sagantaa Waraqaa Eenyummaa Biyyaalessaafi Ejensii Tajaajila Galmeessa Siiviliifi Jiraattummaa Magaalaa Finfinnee waliin ta’uun iftaan Finfinneetti eegalama. Galmeessi waraqaa eenyummaa dijitaalaa kun Finfinneetti yeroo gabaabaa keessatti kan xumuramu ta’uunis ibsameera.
Waraqaan eenyummaa dijitaalaa kun lammiileen tajaajila si’ataafi ammayyaa’aa akka argatan kan taasisu yoo ta’u, galmeessi kun dhalootarraa ka’ee hanga du’aatti taateewwan uumamaafi hawaasummaa galmeessuun seeraaf, bulchiinsaafi odeeffannoo istaatistiksiif madda ta’ee kan tajaajiluudha.
Taateewwan mudatan teknolojiidhaan galmeeffamanii namni kamuu tajaajila damicharraa argamu akka argatu taasisuurra darbee imaammataafi tarsiimoo mootummaan wixineessu odeeffannoo sirriirratti akka hundaa’u taasisuu keessatti gahee olaanaa kan qabu ta’uunis ibsameera.
Ejensiin Tajaajila Galmeessa Siiviliifi Jiraattummaa Bulchiinsi Magaalaa Finfinnee riifoormii dhaabbattummaa adeemsisaa jiru cinaatti jiraattonni tajaajila si’ataafi qaqqabamaa akka argatan taasisuuf sirna waraqaa eenyummaa dijitaalaa waliin walitti hidhuuf Sagantaa Waraqaa Eenyummaa Biyyaalessaa waliin hojjechuuf waliigaltee taasiseera.
Sagantaan galmeessa waraqaa eenyummaa biyyaalessaa kun ejensicha, aanaaleefi kutaalee Magaalaa Finfinnee hundatti kan adeemsifamu ta’uunis ibsameera. Jiraattonni magaalattiifi jiraattota hintaane bakka galmeessi itti adeemsifamu hundatti galmaa’uu kan danda’an ta’uunis ibsameera.
Waraqaan Eenyummaa Biyyaalessaa kun hawaasni tajaajiloota si’ataafi ammayyaa’aa akka argatu taasisuurra darbee sochiin dinagdee fayyabuleessi akka jiraatu taasisuu keessatti gahee olaanaa qaba jechuun Waajjirri Pirojektii Waraqaa Eenyummaa Biyyaalessaa odeeffannoo Bariisaaf ergeen eereera.
Natsaannat Taaddasaatiin
BARIISAA SANBATAA Onkoloolessa 16 Bara 2017
