Irreecha koo xurree seenaa,
Mallattoo du’aa jiraa,
Isaa finiinsaa dharaa,
Bararaan ceessistee,
Riqicha baraa nuu taatee,
Nu keessatti goobsitee,
Of ta’aaf nu mooksitee,
Gaarii yaraa nu mul’iftee,
Dhaloota hiriirsitee,
Irreecha koo irranaa,
Daraaraa waaqeffannaa.
Coqorsa dachee keenyaa
Ejersa qe’ee keenyaa
Siin bullee nuun buli
Sitti irreeffannaa nu milkeessii
Iddoo dhalootaa nu handhuurii
Milkii jireenyaa ati eerii.
Tulluu Cuqqaalaa ati laali,
Guddicha Eerar nu taajjabii,
Hora Arsadii ragaa bahii,
Hora Fiinfinnee atis barii,
Meeqatu karaatti hafee?
Meeqatu yaa Waaq jedhee?
Yaa’aa galaana lammii,
Hiriira hora Arsadii,
Meeqatu irreeffatee?
Meeqatu taliileffatee?
Meeqatu milkeeffatee?
Irreecha koo irree irranaa
Irreecha koo irree si irreeffannaa
Irreecha koo isin gammadnaa
Waaqaa lafatti siin himannaa
Hammeenyi kaanaan si dhokfannee
Nageeny buunaan mirmannee
Tulluu malkaatti si waammannee,
Maqaa bade deeffannee
Bishooftuudha argannee
Okawoodha deebifannee
Sirbinee sirbisiisnee,
Dhiichifnee dhiichisiifnee
Adaamaas deebifannee,
Irreecha koo irree irranaa
Mallattoo malkaa waaqefannaa
Amboo, Walisoo, Finfinnee
Akka keenyattu waammannee.
Guyyaa kee waa yaadannuu?
Ganda Finfinnee keessa baanuu?
Dhiibbaa maqaalee sitti himannuu?
Agamsi Markaatoo ta’ee,
Doobbiin Qacanee taatee,
Hurufni Moombii Jaan Meedaa ta’ee
Walakkaan Daabus Charchil ta’ee
Yekkaanis Ekkaatti jijjiiramee
Dildila Inxooxxoo ta’ee
Roorroodhaaf moggaafamaa
Muujjaanis Shiroo Meedaa
Caffee Tumaanis Siddisti Kiiloo
Aadaa golguuf tolfatee fuuloo
Hunduu garagalee
Qarsaan Kaazaanchiis ta’ee.
Irreecha koo mee naa argii
Kinoo mee naa dhaga’ii
Irreecha koo naa raagii
Fooyyee fooyyeedhaa nuu mul’isii
Fooyyee fooyya’aa dhageessisii
Miidhaa miidhamaa nurraa cabsii
Miidhaa milkii jiidhadhaa
Xurree seenaa dhuudhaadhaa
Irreecha koo irree irranaa,
Mallattoo malkaa waaqeffannaa,
Sitti bulee nuun bulii,
Golgaa nurraa saaqi, nuu mul’isii,
Daba dabarraa nuu deebisii,
Abdataa keetii tolii,
Sa’aa namaan nuu ofkalii,
Hamaa qalbiitii nuu eerii,
Gaarummaa gaarii fiixa baasii,
Wallaalaa itti nuu qarii,
Beekaa itti nuu furii,
Furamee hinlaafinii,
Karaatti nu jalaa hinhafinii,
Irreecha koo irree irranaa,
Isa Oromoo xurree seenaa,
Kallacha caaccuu gadi nuu yaasii,
Aanaa alagaa daaw’achiisii,
Fitinaa baraa nurraa caamsii,
Oromoo sirnaan boonsii,
Haalatu haala uummatee
Namatu maqaa jijjiirratee
Iddoottu maqaa jijjiirratee
Sabatu duudhaa dhokfatee,
Dhiibbaatu irra gomboobee,
Himamee hindhumuu kan Finfinnee,
Calcalliin Saar Beetoochii,
Sangaa Taraanis Garbiidhaa
Qeeraafi Qirqoosis Golboodhaa
Araat Kiiloonis Daalattiidhaa,
Safarri Iraas Kaasaa Baddaa Ejersaatii
Nafaas Silkiin Roobii,
Kanatu maqaan badee,
Deeffachuunis ni dhibee,
Finfinneedhaan golgamee.
Irreecha koo irree irranaa
Didhaa saba dhiibamaa
Sirratti na hambisanii
Yaa Waaq galata haa jennuu
Waan lafa lafaa argannuu
Irreecha koo milkii malkaa
Sumaan Waaqa kadhadhaa
Sumaan Waaqa waqeeffannaa
Kan dhabnes ni argannaa
Waaqatti lallabannaa
Ganna bacaqii qoorfannaa
Birraa booqaatti baanaa
Irraa gora sirreeffannaa
Dogoggora oolfannaa
Hora keetti loowwan bobbaafannaa
Bishaan keetti dhibaafannaa
Malkaa keetti areerrannaa
Hiriirree baanee irreeffannaa
Nuu guuti sitti himannaa
Irreecha koo irree irranaa
Mallattoo Waaqeffannaa
Oromtichi sirnaan mormee,
Ofirraa dhiibee dadhabee,
Yoo jilbi jalatti munyuuquu,
Sirni sirnaan yii dabuu,
Tuttuqee tuqee kaasaa
Geeraree geerarsiisaa
Afoolaan waa himataa
“Dildila dhaabatanii
Caffee gadi ilaaluun hafee
Finfinnee loon keessanii
Hora obaasuun hafee
Tulluu Daalattiirratti
Yaa’iin Gullallee hafee
Gaafarsa darbanii
Qoraan cabsachuuf hafee
Hurufa Boombiirratti
Jabbilee yaasuun hafee
Bara jarri dhufanii
Loon keenya ni dhumanii
Edda Mashashaan dhufee
Birmadummaanis hafee”
Jedhee ittigeeraree.
Afoolaan afoolessaa
Mirga dhabeef komataa
Irree irranaatti waa himaa
Malkaa bu’ee tulluu bahaa
“Yaa Waaq” jedha, Waaqatti himataa
Irreeffatee cuuphata
Badii ofirraa dhiqaa
Irree irranaatti watwaataa
Waan dade sirreeffataa
Waaqa galateeffataa
Masqaluu Baalchaatiin
BARIISAA SANBATAA Onkololeessa 5 / 2015
