“Oromummaamoo Itoophiyummaatu dursaadhaan doorsifameera” – Gaazexeessaafi Barreessaa Abdii Fiixee

Seenaa miidiyaa Oromoo keessatti sammuu Oromoo hedduu keessa kan jiru Gaazexaassaa Abdii Fiixee, keessumaa televizhinii Oromiyaa Miidiyaa Netowrki (OMN) irratti daran beekama.

Kana malees barreessaa kitaaba Dhoksaa Jireenyaa jedhamuufi walaloowwan hedduuti. Yeroo Fincila Diddaa Gabrummaa sana karaa miidiyaafi feesbuukiitiin innis qabsoo finiinsuu keessatti ga’eesaa taphateera.

Erga biyyaa ba’ee waggoota 15 booda dhiheenya kana gara biyyaatti deebi’eera. Gaazeexaan Bariisaas haala yeroorrattiifi sababa miidiyaarraa fagaachuusaa akkasumas, dhimmoota biroorratti gaafdeebii gaazexeessicha wajjin taasise akka armaan gadiitti dhiheessina.

Bariisaa: Mee Abdiin eenyu, kanarraa kaanuu?

Abdii: Maqaan koo Abdii Fiixeeti. Kaniin dhaladhe Godina Wallagga Lixaa, Magaalaa Boojji Dirmajjii jedhamtutti. Magaalattii keessa baay’ee hinturre. Daa’ima waggaa lamaa ta’een abbaan koo hojiif gara Naqamteetti maatii qabatee dhufe. Achitti guddadheen hanga kutaa 10ttin baradhe. Yommuu gara kutaa 11tti darbu abbaan koo hojii ijaarsaa waan hojjetuuf mana barumsaa ijaaruuf gara Najjoo deemnaan isa waliin deemeen achitti kutaa 12fa xumure.

Isaa booda carraa biyya keessa turuuyyu hinarganne. Yommuun kutaa 12fa baradhu haalli biyya keessaas baay’ee namatti hintolu ture. Aniifi hiriyoonnikoos bifa diraamaafi walalootiin otoo mootummaa qeeqaa jirruu ALA bara 2003 lotorii diiviitiin Ameerikaa deeme.

Bariisaa: Akkamiin waa barreessuu eegalte?

Abdii: Waa barreessuun jalqabumaa kaasee keessakoo ture. Abbaan keenya akkumasaa injiinara akka taanuuf barbaaduuf nu jajjabeessaa ture. Pilaanii manaafaa nu hojjechiisaayyu. Kanaaf keessumaa maatiin hundi akkan gara sanatti barbaada ture.

Ani garuu barnoota sadarkaa tokkoffaarraa kaasee hiriira alaabaarratti walaloo dubbisaan ture. Yemmuu sadarkaan barnoota koofi umriin koo dabalaa deemummoo of danda’een barreessuu eegale.

Hiriyaa koo Toleeraa Fiqruu, kitaaba Imimmaan Haadhaafi Raayyaa jedhu barreesse wajjin ta’ee waa barreessuu ittiin fufe. Yemmuu ijoolleen taphaafi bakka biraatti yeroosaanii dabarsan nuti waa’eedhuma barreeffamaa yaadna turre. Kanaan utuu jirruu gara Ameerikaa qajeele.

Bariisaa: Akka Ameerikaa deemteen maalirratti bobbaate? Gara gaazexeessummaatti hoo akkamitti seente?

Abdii: Akka deemeen fiilmii barreessuun baradhe. Kunis hojii barreessuutti akkan fufu na gargaare. Kanuma keessan fuula koo gara miidiyaatti naanneffadhe. Karaa wasiila koo (Obbo Bulchaa Dammaqsaa) namoota guguddoofi ogeessota miidiyaa adda addaa wajjinis walbare. Ogeessonni ani walbareen namoota hojiisaaniitiif fedhii guddaa qaban garuummoo haalota tokko tokkoon gaadi’amanii turaniidha.

Guyyaa gootototaa tokkorrattis walaloo dhiheesse. Inni baay’ee naa jaalatame. Kunis namoota danuu wajjin walbaruuf carraa dabalataa naaf ta’e. Namoota Obbo Bulchaan wal na barsiisan keessaa Ameerikaatti nama tamsaasa raadiyoo jalqabanii turaniifi Abbaan Bariisaa (Hamiid Muudee) isaan tokko.

Istuudiyoo isaan keessatti hojjetan istuudiyoo miidiyaaleen biyyaalessaa qabaniin qixxeedha. Meeshaalee ammayyaa’oofi guguddoo sana yommuu argitu dandeettii kee of tilmaamta. “Kana hindanda’u” miirri jedhu sitti dhaga’ama; garuu ani kana ofitti himuu hinbarbaanne. “Nan danda’an” inni jedhummoo xiqqoo na sodaachise. Kana lamaan gidduuttin nan yaala jedhee gale.

Manatti deebi’ees Obbo Bulchaatiin mari’annaan “ni dandeessa hojjedhu” jedhanii haaloota naaf mijeessan. Namoonnin waliin hojjedhuus na gargaaranii waa hunda na barsiisan. Sana booda barumsaas na baradhe; dandeettiikoos nan gabbifadhe. Dhuma bara 2004 irraa kaasee of danda’een ofii koo hojjechuu eegale. Hanaga bara 2008tti Raadiyoo Hawaasa Oromoo Jaarmiyaa ‘DC’ irra hojjedhe.

Bara 2009 boqonnaan fudhadhe. Bara 2012 Geetaachoo Tarfaasaafi Qumbii Kumsaafaa wajjin taanee raadiyoo ‘Dagalee Media Network’ kan jedhu hundeessine. Otuman raadiyoonicharra hojjechaa jiruu yaadni OMN hundeessuu dhufe.

Bariisaa: Yaadichi maalirraa ka’e laata?

Abdii: Namoonni akka Jawaar Mohaammad, Mohammad Adamoo, Doktar Solomoon Ungaasheefaa taanee Oromoon miidyaa guddaa tokko qabaachuun inuma barbaachisa, miidiyaan dhabamuusaatu nu miidha kanneen jedhan irratti erga yaada jedhurraa dhufe.

Bariisaa: Ejjennoo ‘Oromo First’ jedhamaa ture wajjin walqabatee maaltu si mudateeyyu?

Abdii: Ejjennichaan walqabatee namootaa wajjin walitti bu’e. Yeroo sana Jawaar waliin walitti dhiheenya baay’ee hinqabnu. Waltajjiilee addaddaarratti walagarra. Waa’ee Oromoorratti immoo dhaabbannee waliin mari’anna. Kana gidduutti waa’ee ‘Oromo First’ Jawaar ibsa kenne. Yeroos ani ‘DC’n ture. Kanarraa ka’uun Jawaar irratti duula guddaatu baname ture. Akkamiin akkas jedha jedhanii irratti ka’an.

Asirratti waanin kaasuu barbaadu ‘Oromo First’ waliin Jawaar maqaa haadhaa’amu malee yaadichi kan isaa qofa hinturre. Yeroos Oromootu abaaramaa, arrabsamaa ture. Kanaaf deebii akka ta’uuf yaadni, “Jalqaba ani Oromoodha (‘I am an Oromo First’) jedhu ka’e. Utuun Itoophiyummaakoo hinbariin ani dura Oromummaa koon beeka.

Maatiikoorraa fudhadhee kanin itti guddadhe kanin dhaale Oromummaadha. Itoophiyummaan kan irratti waliigaluu dandeessuudha. Biyya tokko dhaqxee lammummaa biyya sanaa fudhachuu dandeessa. Qomookee garuu jijjiiruu hindandeessu; gurraachi adii ta’uu, adiin gurraacha ta’uu hindanda’u; Oromoon Amaaraa ta’uu hindanda’u, Amaarris Oromoo ta’uu hindanda’u.

Kanaafi, ani gaafan dhaladhu Oromummaa kooti kanin beeku. Itoophiyummaarratti garuu, haalli yoo mijate yoo biyyi hunda keenyaaf taatu, kan tokko tuffatamee, inni tokko olaantummaa gonfatee, ani hidda mootiiti kan jedhu hinjiru yoo ta’e waliigallee Itoophiyummaa fudhanna. Yoo ta’uu baate garuu dhiibnee moggaatti walbaasna.

Yoo Oromoon lammummaansaa Itoophiyaadha jenne, jalqabuma akka isa yaadu hintaasifamne. Siyaas dinagdeefi hawaasummaatiin moggaatti baafamee arrabsamaa, miidhamaati kaninni jiraate. Akka abbaa ga’ee tokkootti boonee Itoophiyummaa akka himatu hintaasifamne.

Yoo amantii ta’ee amantii tokko, yoo biyya ta’e biyya tokko, yoo alaabaa ta’e alaabaa tokko jedhanii nutti himaa nu guddisan. Oromummaa keenya lafa keenyee garasaanii akka deemnu nu taasisan. Isaan achi keessatti waan dhaban hinqaban. Sababnisaa yoo sirba ta’e rukuttaasaanii, alaabaa taanaan kan ofii jaalatan qabatu.

Egaa yaadota kanneeniifi kkf ture barreessee ‘youtube’ irratti kaniin gadhiise. Galgala tokko hiriyoota koo wajjin taphachaa turee gara manakoo deeme. Oggaan suuqiidhaa waa bitadhee deebi’u namoonni sadii na hordofaa turan dukkana keessatti na qabanii, lafaan na dha’an. Shukkaa adda kootti qabanii Amaariffaan, “Mee amma dubbadhu. Oromummaamoo Itoophiyummaatu dursa?” jedhanii utuu na doorsisaa jiranii gidduutti konkolaataan tokko fagoodhaa dhufe.

Bakkichi saffisa hir’isuuf waan hojjetame qaba. Oggaa konkolaatichi namoota sanarratti ibse. Kanaa booda dokimantiiwwan na harka turan fudhatanii baqatan. Poolisiin hamma yeroo dhihootti hordofaa turus dhumarratti maalirra akka gahe quba hinqabu.

Bariisaa: Raadiyoo duraan irra hojjetaa turteefis ta’e OMNf haala kamiin odeeffannoo biyya keessaa argattuuyyu?

Abdii: Namoota of kennan garuu, iccitii qabatan hedduu wajjin hojjechaa turre. Haallitti namoota kanneenqunnamnu turre daran ammayaa’aadha. Nageenya namoota kanneeniitiif of eeggannaa guddaa gochaa turre. Akka tasaa yoo qabamanillee akka dokimantiin harkatti hinargamne taasisne.

Haala kanaan akka dhaabaattis ta’e dhuunfaatti namoota hedduu wajjin hojjetaa turre. Haala kanaanis odeeffannoo wayitaawaa argachaa kan turre. Odeeffannoo argannu ni qulqulleessina. Caasaalee mootummaa keessaas odeeffannoon nu ga’aa ture. Walga’iiwwan xixiqqoo taa’anirraa eegalee sagaleen ba’ee nu qaqqabaa ture. Walumaagalatti haalota kanneeniin odeeffannoo argachaa turre jechuudha.

Bariisaa: Odeeffannoo agachuurratti rakkachaa hinturre jechuudhaa?

Abdii: Daran rakkisaa ture malee. Yeroo odeeffannoowwan gurguddoo nuuf erguuf jedhanitti namoonni qabamaniifi miidhaman jiru. Wantidaran na dinqu utuma akka miidhaan irra ga’uu beekanii “haa ta’u Oromummaaf jedhee yoon miidhame homaa miti” jedhanii nuu erguu turan. Baay’een isaanii harkatti qabameera. Garuu dhalooti kun of kennaa waan ta’eef homaanuu ejjennoosaarraa deebi’uu hindandeenye.

Bariisaa: Maaliif OMN gadidhiiste? Ergasiimmoo miidiyaa biraatiin nan dhufa jettee turte, inni hoo akkam ta’e?

Abdii: Namni yeroo walwajjin hojjetu mudannoo xiqqoon uumamuu hinoolu; miilliyyuu gaafa deemu walitti bu’a mitiiree? Yeroo tokko tokko garuu akkaataan nuti itti waldhabdee keenya furachuuf yaallu miira keessa nu galchuu danda’a. Anis waldhabdeedhuma xiqqoo tokkoonin hojiikoo gadi dhiise. Waldhabdeen keenya dhimma hojii qofarratti. Akkan biyya dhufeen hiriyoota koo OMN keessa hojjetan dhaqee dubbiseera. Isaaniif akkuma durii jaalalaafi kabajan qaba.

OMN miidiyaa saba bal’aa wajjin walqunnamsise waan ta’eef akka dhala hangafaattin ilaala. Ammayyuu yaadaan waanin jiruuf milkaa’inan hawwaaf. Bilbilees yaada kan kennaaf.
Miidiyaa biraatiin dhufuu yaadeen ture. Haala sana keessattiin fiilmii tokko jalqabe. Inni baay’ee yerookoo fudhate. Haalli biyya keenyaas xiqqooshee na qabe. Namoonnis yaadawwan addaddaa keessa turan. Haala akkanaa keessatti baay’achuun miidiyaa bu’aa hinqabu jedheen yaadicha tursiise. Imalakoo gara biyyaatti taasise keessatti aanga’oota tokko tokko yaadicharratti mari’adheera. Ji’oota lamaan booda deebi’een haala mijeeffadha. kan xiyyeeffatu ta’ee bu’aa ba’ii ijoollee keenya shamarraniirra biyyoota giddugaleessa bahaatti gahurratti kan barreeffameedha.

Ittifufa

Saamraawiit Girmaa

Bariisaa Guraadhala 15/2011