Qiddist Gezaheny
Addis Ababa:- Egennaammu cancishaano HWHTha gobba diigate seeranna hanaffinoha tiiu ola xawo fushshatenni gobba gatisate yawo noonsata Gonderete Yuniversite tiiu rosi goli sooreessinna rosiisaanchi kaa’laanchu pirofeeserchi Netsaannet Bayileyyenyihu egensiisi.
Kaa’laanchu pirofeeserchi Netsaanneti baxxinohunni Itophiyu Pireesete Uurrinshara xawisino garinni; cancishaano HWHT qodhote sharro yannanni hanaffe sorote duduwo fincatenni buqqeete ola harisatenni batinye huno iillishshanni; konninnino mootimma diigatenni gobba billaallisatenna daga dagate ledo xeertisate horonsidhanni keeshshitino.
Techono iillishshanni noo cancu assootinni luphi yinoha kaphu duduwo fincatenni tiiu
ola iillishshanni afantanno. Tini harinsho yannatenni dawaro aa hoonginsaronna ittisa hoongiro dagate keereno ikko gobbate mittimma danote aana tuggannoreeti. Konnirano cancishaano HWHT gobba gashshitino yannara wo’minonsakkiha gobba diigate seera olunnino wo’naalteenna ikkitinonsakki daafira; xaa yannara hanaffinoha tiiu oli gaado egensiisanna uurrisa egennaammuwiinni agarrannite.
Kaa’laanchu pirofeeserchi Netsaanneti xawishshi garinni; konnira egennaammu yawo garunni fulatenna loosonsa gummaamo assate dandiissannota 24 miilla amaddino xiinxallo Gonderete Yuniversitera harinsoonni. Tenne xiinxallonnino batinye mashalaqqe gamba assinoonni. Batinye e’’ono afi’noonni.
Konninni baxxinohunni Wolqaytira, Tsellemtiranna wolootu qooxeessuwara sa’u 27 dirrara Cancishaano HWHTnni iillitinota bude horrate, buqqeete xiiwonna sircho hunate hattono miinju sharre millimmo xiinxallotenni amadante shiqqino. Eo tenne yannanni cancishaano HWHT assoote gumulsate miidiyu noosi qeechano amaddanno.
Xiinxallo muli yannanni HWHT cancishaano gaamonni Maykaadraho gooffinori keraano qansooti ayeoo ikkitinoro; hiikkonna hiittoo akati giddo gooffinoro misiletenni irkisantino taje shiqishate hasiissanno mashalaqqe gamba assite amaddino.
Kunino dagganno ilamara cancishaano HWHTnni iillitanni keeshshitino jifo sayinsete doogonni tajetenni irkinse noo halaale affanno gede assate dandiissitannote. Tini xinxallo muli yannanni odeessaancho filmenni; Maxaafichotenna Maxaafunni hattono Joornaalete garinni attamisiinse fushshatenni dagate xawo assinannita qummi assinohu kaa’laanchu pirofeeserchi Netsaanneti; wolootu egennaammino cancishaano HWHT gobba diigate seera qinaawinonna sayinsete doogonni tajetenni irkisse gobba giddonna gobbaydi kalqera xawo assatenni gobba gatisate loosa hasiissannonsa yaanni coyi’rino.
Bakkalcho Woxawaajje 13, 2013
