Addisu Adoola
Xoollay: Cancishaanchu HWHT qaalu saysaanchi Geetaacho Reddihu “Itophiyu aana gano iillishshanni noo cancishaano wolquwanni naaxxoommonsa” yaasira, hattono poropogaandu gaadiranna hufasira gargartote olanto afuunni ikkikkinni loosunni dawaro uytannota Xoollay olantote qajeelshi mereershi massagaano xawissu.
Xoollay olantote qajeelshu mereershira 4ki Shaalaqi 2ki Shaambelle hajajaancho ikkinohu Kumu Roorrichi Asaayye Aberrihu Itophiyu Pireesete Uurrinshara xawisino garinni; Itophiyu qansicha ikke Itophiya gana saalsiisannonna shollaataamo assooteti. Isono, cancishaanchu HWHT qaalu saysaanchi Geetaacho Reddihu, lamala Itophiyu aana gano iillishshanni noo “Tigirayete wedellinni naaxxoommo” yaasi shollinyu hasaawaati. Konni hasaawisira qole gargartote olanto afuu poropogaanda ikkikkinni loosu dawaro uytannosiha ikkanno.
Massaggino gobba wirro diigate qeenfata “intoonni xilte hiiqqate gedeeti” yinohu Kumu Roorrichi Asaayye; cancishaanchu HWHT qaalu saysaanchi assootisino, hasaawisino saalsiisannonna gobbasinna dagasi seekke afinokkiha ikkasi leellishannoho yino. Konnirano Juntu madaarshisi gumulamanna gobba e’ino Juntu sharrenni keere fulta geeshsha 24 sa”aate goxxukkinni fooliishshoweello loossannota coyi’rino. “Isi qeenfatatenni shiqishinoha ninke loosunni qolate qixxaamboommono” yaatennino xawisino.
Xoollaaye olantote qajeelshi mereershi massagaancho ikkinohu Layinkihu Xibbuu Roorrichi Abaate Wondimmuhu isi widoonni; batinye yanna cancishaanchu widoonni hemaanchunna qaalu saysaanchi Kalaa Geetaacho Reddihu, coyi’ranno coy me”e bareedda kakkaloonni waajjantenna ayirrisante keeshshitino gobbanni ilamino manchiwiinni agarrannikkiha ikkinota coyi’rino.
Layinkihu Xibbuu Roorrichi Abaate xawishshi garinni; cancishaanchu gaamo daga hembeelsitanni gobbaydinnino afidhanno kaa’lonni jeefote wolqasi leellishate fittifattanni afantanno. Sharrono dagannita assate aana no. Konninnino qaaqquulle, meentonna geerra olaho beeqqisiissanni no. Itophiyu aana iillishshanni noo saalfachishshanno barshe worbimmate gede kiirte qaalu saysaanchi widoonni sokka sayissino. Konni hasaawisira rabbate dawaro afidhannohu olantote qaalinni loosunni ikkanno yino.
Ledoteno; “Geetaacho Reddihu hasaawi shollinyunna shonte wo’mitinoho. Cancishaancho gaamo Itophiyimma qalxitannose daafira diadhitanno. Insa dhagge dagganno ilamara hiittoo garinni borreessantara dandiitannoro dileellanno. Cancishaanchu dhaggete giddo Aluuli Abbaanaggihu gedee dhagge cira diheedhanno. Bareedu beetti bareeda ikkirono insa kayinni moromaasineho. Assistino assootinna hasaawi naaxxisannoha ikkikkinni sannate ilama huuteessannoho. Itophiyu qole gotti yaannoho ikkinnina uwe gatannoha ikkinokki daafira insa cancinni ilama hembeeltara dihasiisanno” yino.
Bakkalcho Woxawaajje 13, 2013
