Addis Ababa:- Goofu zoonera kalaqantino tige to’’ate danonni gattinoriranna qa’’ensanni darantino qansootira komite uurrinse irko gamba assate looso hananfoonnita Wodiidi Itophiyi Daga Qoqqowi Mootimmate Xaadooshshi Biiro egensiissu.
Qoqqowu motimmate xadooshshi soreette dukko Sennayit Selemooni Itophiyu Pireesete Uurrinshara xawissanni; qoqqowoho Goofu zoone Gezze Goofa woradi Kencho Sacha Gozni olliira kalaqantino tige to’’ate danonni tenne odoo qixxeessini yanna geeshsha 2 xibbii ali manni lubbo ba’ino.
Federaalete danote bidhatto loosu massago komishiine qoqqowu danote bidhatto loosu massago komishiine ledo halamatenni 4 xibbi kuntaali ale gide, uduunnenna sagale qishi’nanninna intanni uduunne shiqishate looso loossanni afantannota qummeessitino.
Ledoteno wiinamu dano yanna marro uurrisate komite uurrinse danotenni gawajjantino dagara kaa’looshshe gamba assate looso hananfoonni.
Qooxeessaho ganino kaajjado xeena harunsite kalaqantino tige to’’ate danonni mitte maate aana dano iillase harunsite insa gatisate fultino qooxeessu teessaano, ga’labbote bissanna olluu massagaano aana ledote dano iillitinotanna konninnino lubbonsa hooggino manni kiiro lexxitanni hadhinota huwachishshino.
Konni albaanni qooxeessaho tige to’’ate dano duucha higge kalaqantannota xawissinoti dukko Sennayiti; tenne danonni luphiima mannu lubbo ba’ino yitino.
Danote korkaatinni gawajjantinorinna lubbo gattino daga Hospitaalete xagisidhanni afantannota huwachishshino.
Dukko Sennayiti xawishshi garinni; xaa yannara danotenni gattinorenna darantino daga qooxeessaho afantanno mootimmate uurrinshuwaranna rosu minnara yannate geeshsha fooliishshiishatenna barru sagale shiqishate looso loonsanni hee’noonni.
Gawajjantino daga irkisanna lubbo gatisate loosira balaxo uyine loonsanni hee’noonni yitinoti Sooreette; qooxeessaho ledote dano kalaqantannokki gede qoropho assinanni gedenna dagoomaho huwanyo kalaqate looso loonsanni hee’noonnita egensiissino.
Lubbonsa hooggino manni kiiro lexxitanni nooha ikkasinni xaa yannara reeshsha hasate loosi kaajje sufinota qummeessitino.
Qiddist Gezzaheny
Bakkalcho Maaja 18, 2016 M.D
