Addis Ababa:- Tayxe giwiru baatooshshinni xaphooma 75 miliyoone birra eo gamba assate mixo amandoonnita Lakkote quchumi gashshooti Eote biilloonyi sinu borro mini xawisino.
Konni giddonni 60.1 miliyoone ganyetenninna 15 miliyoone maazzagaajunni gamba assinannita borrote mini lede buuxisino.
Itophiyu pireesete uurrinsha ledo hasaawa assinohu Lakkote quchumi gashshooti e’’ote biilloonyi sinu borro mini sooreessi kalaa Birru Made coyi’ranni; quchumu daddalaanonni xaphooma 75 miliyoone birra gamba assate hende loonsanni hee’noonnita kule; konni giddonni 60.1 miliyoone ganyete giwiru baataanonninna 15 miliyoone maazzagaaju mininni gamba assinanni e’’o ikkase qummeessino.
Quchumaho deerra ‘A’ giwiru baataano 101, deerra ‘B’ nni 102 na hattono deerra ‘C’ ni 1028 giwiru baataano nooha ikkanna; baatooshshuno tekinoloojetenni irkisamino garinni gumulamanni noota kalaa Birru qummeessino.
Giwiru baatooshshi tekinoloojetenni irkisaminoha ikka qarunni baatooshshu wiinamunni gumulamanno gede assatenni aleenni baataanoteno ikko ogeeyyete daafuronna tultaawa luphi yino deerrinni ajishshino; hattono woxu ledo kikkisama gatisatenni baataano hagiirraamma assinota qummeessino.
Konni garinni xaa yannara deerra ‘C’ giwiru baataano mine minensa heedhe Teele birrenni baattanni noota qummeessannohu borrote mini sooreessi; neetworkete murmurama giddoonnino ikkirono; xaa geeshsha 70% ikkitannori tenne hayyonni baatooshshensa gumultinota buuxisino. Tayxe gamba assate amandoonni mixo sai diri ledo heewisiinsanni woyte lowo badooshshi noota kayisannohu sooreessu; sai diro Lakkote quchuminni xaphooma 47 miliyoone gamba assate mixi’noonnita kayise; tayxe kayinni 75 miliyoone birra gamba assate hende loonsanni hee’noonni; kuni jawa badooshshe ikkasi huwachishanno.
Qiddist Gezzaheny
Bakkalcho Maaja 11, 2016 M.D
