Abebech Maatewoos
Addis Ababa: Cancishaano HWHTnna Shene waaxama dirra kiirsiisinoha maaxamino hunote jaaloomansa xawo fushshatenni saino guma abbannokkita daga afa noose yee Oromote wolaphora albisaancho ikke sharramanni keeshshinohu kalaa Gellaasa Dilbohu xawisi.
Kalaa Gellaasa tenne hajo lainohunni Itophiyu preesete uurrinshara xawisino garinni; HWHT sa`u dirrara dimokraasete abboommohu aneeti yaanni daga awaawuranni annootto ikke assootesi gibbannore usuratenni, fuge shaatenni, raateessanninna gobbatenni shorrantanno gede assino hunote gaamooti.
Lamente gaamo xaadooshshi xaa yannara xawo ikkasinni sa”e dirra kiirsiissino hajooti yinohu kalaa Gellaasa; cancishaano faajjetenni mittimma kalaqansa didhaggeeffachishanno yino.
Shene sannate Oromote sharro gufisinoho. Sharramaano Nedi Gemmeda, Gutema Hawaasi labbannore kumunni kiirranni muxxe Oromote wolaphora sharrantannore shee garunni xawisinokki uurrinshaati yee coyi`rino.
Oromo wole roduuwu daga gede wolaphosera sharramatenni duhano ikkinoseha miinjunna poletiku kado aaninni hoo`late qaraartino sharro assitino daga ikkase huwachishino.
Cancishaano HWHT kalaqosinni “Billoonye aneweelo, daganna dagoomu xa`mo aneweelo xaphoomunni duuchunku coy aneweelo” yaatenni qaafanno uurrinshaati. Onegi kaa`lo madaarateno reekkote yannara sumummete su`minni onegete olanto kaampe e`anno gede assatenni gumulino ganosi Oromote sharro aana iillishshino gawajjonna bassa dhaggetenni hambannikkiha ikkinota huwachishino.
Cancishaanchu gaamo Oromonnitano ikko wole Itophiyu daga gawajjinokkiha, jironsa horrinokkihanna lubbo shiinokkiha lawe xaa yannara arrawosi buurunni cuukkire albasi maxinetenni hayishshire furduggi yaasi salfatannokki gaamo ikkasi leelishanno yino.
Cancishaano shene Oromote daga raateessinonna jawa waaga baatisiisanni keeshino gaamo ledo waaxaminota macciishshano ayirritanno yinohu kalaa Gellaasi; HWHT lubbo huninota Shene hawiro Oromote daga kayinni dihabbanno; kunninnino sae batinye Oromote sharramaano reeshsha massine duunnoonniti Oromiyu xashshuwanna dubbuwa dihabbanno yeeno coyi`rino.
Duuchunku aleenni gaamo kaphu duduwinni daga heembeelsatenni sufansa gatannokkiha ikkasinni kuri cancishaanote gaamo hedo qeelate tuqu xaadooshshuwa lede babbaxxino garinni huwanyo cu’mishiishate loossa kaajjinshe hala`ladunni loonsara hasiissannota huwachishino.
Bakkalcho Woxawaajje 13, 2013
