Hawaasa:- Sidaamu qoqqowira fiqaaqqunna agadu gidi laalchimma diru giddo 4.7 miliyoone kuntaala iillisha dandiinoonnita Qoqqowu Irshunna Kalaqamu Jiro Latishshi Biiro egensiissu.
Biirote sooreessi kalaa Memmiru Moke Itophiyu pireesete uurrinshara xawisino garinni; Sidaamu qoqqowunni tantanami kawa kalaqantino kaayyonni gibirrinnu loosi hayyo woyyeessatenni laalchunna laalchimma lophitanno gede assinoonni. Qoqqowu tantanora albaanni fiqaaqunna agadu gidi laalchimma diru giddo 3.9 miliyoone kuntaala ikkasi kaysinohu sooreessu; xaa yannara kayinni handaarunni diru giddo 4.7 miliyoone kuntaala afi’ra dandiinoonnita buuxisino.
Fiqaaqunna agadu gidi latishsha loonsani baatto sa’u sase dirrara albaanni 118 kume hekitaare ikkitanna; xaa yannara 139 kume hekitaare iilliino. Qoqqowoho Badalate laalchimma sase dirrara albaanni mitte hekitaarenni 29 kuntaala afi’nanniwiinni xaa yannara 46 kuntaala afi’ra dandiinoonnita kaysinohu kalaa Memmiru; qaddo loosidhe galtinori kayinni mitte hekitaarenni 60-70 kuntaali geeshsha laalcho afi’ra dandiitinota buuxisino.
Qoqqowu tantano adda ikkituhu 2013M.D gedensaanni gibrinnu loosi hayyo woyyeessitanno tekinolojenna hasiissanno waaco loosidhe galtinorira garunni iillisha dandiinoonni daafira handaaru laalchimma lopho leellishshanni daggino yiino. Kalaa Memmiru xawishshi garinni; qoqqowoho gibrinnu handaarinni sagalete wowe buuxisiisa, Industirete ikkitanno waacubba shiqisha, gobbaydi dikkora sonkanninna gobbaydinni eessinanni laalcho gobbate giddo laalchinni riqiwatenna dandiinanni garinni laashsha hattono qansootaho handaarunni loosu kaayyo kalaqate illachinshe loonsanni hee’noonni.
Konni handaarinni amandoonni mixo timo gantanno gede loosidhe galtinori harancho yanna giddo hala’lado baatto loosi’ra dandiitannota yannitte hayyo horoonsidhanno gede assinanni hee’noonnita qummeesse; konninni, xaa yannara qoqqowoho latinsanni baatto boco ikkitannoti qasiisotenni latinsannita xawisino.
Qoqqowunihu dooramino sirchi shiqqo sase dirrara albaanni 19 kumi kuntaalira noowinni xaa yannara 62 kume kuntaala iillinshoonni. Bushshu madaabbari shiqqo kayinni 139 kume kuntaala ikkanna xaa yannara kayinni 266 kume kuntaala shiqisha dandiinoonnnita sooreessu xawisino.
Qoqqowoho diru giddo 3.2 miliyoone toone ale kalaqamu harishsha qixxeessinannita kule; konninni, loosidhe galtinori gibrinnu ekistenshiine waaco horonsi’raano kiiro sase dirrara albaanni 546 kume ikkitanna xaa yannara kayinni 850 kume iillitinota lede egensiisino.
Amsaalu Felleqe
Bakkalcho Maaja 11, 2016 M.D
